Dodamarg News | घराच्या अंगणातील शेडमध्ये घुसला कँटर

दोडामार्ग : सासोली सरपंच बळीराम शेटये यांच्या घराच्या अंगणातील पत्र्याच्या शेडला एका कँटरने जोरदार धडक दिली. या अपघातात सरपंचांच्या वहिनीला किरकोळ दुखापत झाली. सुदैवानेच मोठा अनर्थ टळला. मात्र शेडचे मोठे नुकसान झाले असून अंगणात उभ्या ओमनी गाडीलाही धडक बसून लाखो रुपयांचे नुकसान झाले आहे. सोमवारी सकाळी हा अपघात झाला.

गोवा येथून माल भरून एक आयशर कँटर सोमवारी सकाळी दोडामागर्र् ते बांदा जात होता. सासोली येथील एका वळणावर कॅन्टर आला असता चालकाचा गाडीवरील ताबा सुटला आणि गाडी थेट रस्त्यालगत असलेल्या बळीराम शेटये यांच्या घराच्या अंगणात घुसला.

अंगणातील पत्र्याच्या शेडला कँटरची धडक बसली. परिणामी शेडचे खांब मोडून पडले. या धडकेमुळे शेडच्या छप्पराची उडालेली काही कौले अंगणात उभ्या महिलेच्या अंगावर पडल्याने ती किरकोळ जखमी झाली.

दरम्यान, या कॅन्टरची अंगणात उभ्या ओमनी गाडीलाही धडक बसल्याने ओमनी गाडीचेही मोठे नुकसान झाले. या अपघातात शेटये यांचे लाखो रुपयाचे नुकसान झाले. त्यांनी पंधरा दिवसांपूर्वीच घराच्या अंगणात पत्र्याची ही नवीन शेड बांधली होती.