देवरूख : शहरातील वरची आळी येथे एका 30 वर्षीय विवाहितेचा घराबाहेरील बाथरूममध्ये जळून मृत्यू झाल्याची धक्कादायक घटना सोमवार, दि. 22 डिसेंबर रोजी पहाटेच्या सुमारास उघडकीस आली आहे. अक्षरा अरविंद मोहिते असे मृत विवाहितेचे नाव असून, याप्रकरणी देवरूख पोलिस ठाण्यात आकस्मिक मृत्यूची नोंद करण्यात आली आहे. दरम्यान, या घटनेचे कारण अद्याप समोर आलेले नाही.
याबाबत मिळालेल्या माहितीनुसार, रविवार, दि. 21 डिसेंबर रोजी रात्री अक्षरा मोहिते या नेहमीप्रमाणे जेवण करून घरात झोपल्या होत्या. दरम्यान, सोमवारी 22 डिसेंबर रोजी पहाटे सव्वाचार वाजण्याच्या सुमारास त्यांचा सात वर्षांचा मुलगा आलोक याला जाग आली असता त्याला आई बिछान्यावर आढळली नाही. यानंतर मुलाने घरातच राहणार्या वडिलांच्या मावशी ताराबाई शिंदे यांना उठवले. ताराबाई आणि आलोक याने घरात शोधाशोध केली, मात्र अक्षरा दिसल्या नाहीत. यामुळे घाबरलेल्या मुलाने आणि ताराबाई यांनी शेजारी राहणारे काका दत्ताराम तुकाराम मोहिते यांना उठवून घडलेला प्रकार सांगितला. त्या नंतर सर्वांनी मिळून पुन्हा शोध घेतला असता, घराबाहेरील बाथरूममध्ये अक्षरा या भाजलेल्या अवस्थेत आढळून आल्या.
नातेवाईकांनी आणि स्थानिकांनी घटनेची माहिती तत्काळ देवरुख पोलिसांना दिली. पोलिसांनी घटनास्थळी धाव घेत अर्धवट जळालेल्या अवस्थेतील अक्षरा यांना तत्काळ देवरुख ग्रामीण रुग्णालयात दाखल केले. मात्र, तेथील वैद्यकीय अधिकार्यांनी तपासून त्यांना मृत घोषित केले. या प्रकरणी देवरुख पोलिस ठाण्यात भारतीय नागरिक सुरक्षा संहिता 194 अन्वये आकस्मिक मृत्यूची नोंद करण्यात आली असून पोलीस अधिक तपास करत आहेत.
