दोडामार्ग; पुढारी वृत्तसेवा : सतत पडणाऱ्या पावसामुळे वर्षा पर्यटनासाठी प्रसिद्ध असलेला मांगेली धबधबा पूर्ण क्षमतेने वाहू लागला आहे. परिणामी मोठ्या संख्येने पर्यटक येत असून मनमुराद आनंद लुटत आहेत. मात्र तेथे अद्यापही अनेक समस्यांची वाणवा आहे. यात मुख्यत्वे करून महिला पर्यटकांसाठी चेंजिंग रुम, धबधब्याच्या ठिकाणी जाण्यासाठी घाटपायऱ्या होणे आवश्यक आहे.
मांगेली धबधबा पाहण्यासाठी गेल्या अनेक वर्षांपासून जिल्ह्यासहित लगतच्या गोवा व बेळगाव येथून पर्यटक येतात. या परिसरात रिमझिम बरसणारा पाऊस, दाट धुके, मनमोहक निसर्ग सौंदर्य, आणि दूरवर पसरलेला तिलारी धरणाचा विस्तीर्ण जलाशय अशा अनेक गोष्टींमुळे हा परिसर नेहमीच पर्यटकांना आकर्षित करतो. पावसाळ्यात या सर्व गोष्टी अनुभवण्यासाठी पर्यटकांची गर्दी होत असते.
आंबोलीपेक्षा सर्व दृष्टीकोनातून सुरक्षित वाटणारा मांगेली धबधबा असून दिवसेंदिवस त्याचे महत्त्व वाढत आहे. मांगेली धबधबा हा कर्नाटक हद्दीतील सडा येथून कोसळतो. सडा माळरानावरील जंगलातील धबधब्याचे पाणी महाराष्ट्राच्या हद्दीत पडते. तेथे जाताना खोक्रल तिठ्यापासून वातावरण थंडगार असल्याने पर्यटक कौटुंबिक परिवारासह आनंद लुटण्यासाठी येतात. शनिवार व रविवार सुट्टीचा दिवस असल्याने याठिकाणी पर्यटकांची तोबा गर्दी उसळते. या गर्दीवर नियंत्रण ठेवणे काही वेळा पोलिसांना अशक्य होते.
मांगेली येथील डोंगरावरून कोसळणाऱ्या या धबधब्याकडे जाण्यासाठी पर्यटकांची आपसुकच पावले वळली जातात. मात्र धबधब्याच्या पायथ्याशी जाताना झाडीझुडपे व दगडातून पर्यटकांना जावे लागते. यावेळी पर्यटकांना त्रास सहन करावा लागतो. शिवाय तेथे महिलांसाठी चेंजिंग रुमची देखील व्यवस्था नाही. त्यामुळे तेथे महाराष्ट्र पर्यटन विकास महामंडळाने घाटपायऱ्या व महिलांसाठी चेंजिंग रुम बनवावी, अशी मागणी वारंवार केली जात आहे.
हेही वाचा :
