Electricity Bill Increase: देशभरात उष्णता वाढत असताना गरीब आणि निम्न-मध्यमवर्गीय कुटुंबांसमोर आता नवंच संकट उभं राहिलं आहे. प्रचंड उकाडा असूनही वाढत्या वीजबिलाच्या भीतीमुळे अनेकांना घरात कूलर, पंखे किंवा इतर उपकरणं वापरणं परवडेनासं झालं आहे. विशेषतः महाराष्ट्रातील अनेक भागांत वीजदर जास्त असल्याने परिस्थिती अधिक गंभीर बनली आहे.
नागपूरसारख्या देशातील सर्वाधिक उष्ण शहरांमध्ये तापमान 40 अंश सेल्सिअसच्या पुढे गेलं आहे. मात्र, अशा प्रचंड उकाड्यातही अनेक कुटुंबं कूलर सुरू करण्यास घाबरत आहेत. कारण, महिन्याच्या शेवटी येणारं वीजबिल.
नागपूरमधील अनेक कुटुंबांची अवस्था बिकट आहे. घरात कूलर असूनही तो बंद ठेवावा लागतो. एप्रिल महिन्यात अवघ्या 188 युनिट वीज वापरूनही जवळपास 2 हजार रुपयांचं बिल आल्याने कुटुंबांवर आर्थिक ताण वाढला आहे.
वीजबिल कमी यावं म्हणून अनेक कुटुंबं दिवसभर घराबाहेर राहणं पसंत करत आहेत. पत्र्याची घरं दिवसभर तापलेली असतात. त्यामुळे रात्री उशिरापर्यंत लोक घराबाहेर बसून वेळ घालवत असल्याचं चित्र काही भागांत दिसत आहे.
महाराष्ट्रात देशातील महागड्या वीजदरांपैकी एक असल्याचं मानलं जातं. मोठं औद्योगिक जाळं आणि वीज पायाभूत सुविधांवर मोठा खर्च हे त्यामागचं प्रमुख कारण असल्याचं सांगितलं जात आहे.
Maharashtra State Electricity Distribution Company Limited (MSEDCL) ने वीज पुरवठा व्यवस्था मजबूत करण्यासाठी मोठी गुंतवणूक केली आहे. मात्र, त्याचा आर्थिक भार ग्राहकांवर पडत असल्याची टीका होत आहे.
ही समस्या फक्त शहरांपुरती मर्यादित नाही. ग्रामीण भागातही शेतकरी त्रस्त आहेत. शेतासाठी वीज मिळत असली तरी ती अनेकदा दुपारच्या कडक उन्हात मिळते. अशा वेळी शेतात जाऊन मोटार सुरू करणं जीवावर बेतू शकतं, असं शेतकऱ्यांचं म्हणणं आहे. योग्य वेळेत वीज न मिळाल्याने अनेक शेतकरी शेती कमी करत असून काहीजण पावसावरच अवलंबून आहेत.
तज्ज्ञांच्या मते, उन्हाळ्यात कमी उत्पन्न असलेल्या कुटुंबांसाठी विशेष वीज सवलत किंवा हंगामी सबसिडी देण्याचा विचार राज्य सरकारांनी करायला हवा. यामुळे आरोग्यावरील धोका कमी होईल आणि लोकांना उष्णतेत आवश्यक उपकरणं वापरणं शक्य होईल.
