के. के. रेंज हद्दीत चोरी, खारेकर्जुनेतील प्रकार

वाळकी : पुढारी वृत्तसेवा :  खारेकर्जुने येथील लष्कराच्या के. के. रेंज हद्दीत अज्ञात चोरट्याने लष्करी मालकीच्या इलेक्ट्रिक केबलची चोरी केली. बुधवारी रात्री ही घटना घडली. याप्रकरणी लष्करातील एअर फोर्स नायक महेंद्रसिंग समशेरसिंग यांनी एमआयडीसी पोलिस ठाण्यात फिर्याद दिली आहे.

अज्ञात चोरट्यांनी बुधवारी (दि.10) सायंकाळी 6 ते गुरुवारी (दि.11) सकाळी 6 या कालावधीत के. के. रेंज हद्दीत बेकायदेशीरपणे प्रवेश करून लष्करी मालकीच्या काळ्या रंगाच्या इलेक्ट्रिक केबलची चोरी केल्याचे फिर्यादीत म्हटले आहे. पोलिसांनी अज्ञात चोरट्यांच्या विरोधात भा.दं.वि.कलम 379 अन्वये गुन्हा दाखल केला आहे.