श्रीरामपूर; पुढारी वृत्तसेवा : मकर संक्रांतीला गच्चीवर पतंग उडविण्याच्या नादात तिसर्या मजल्यावरून तोल जाऊन खाली पडल्याने शहरातील मोरगेवस्ती येथे राहणारा भूषण शरद परदेशी (वय 22) या तरुणाचा मृत्यू होण्याची घटना काल घडल्याने संपूर्ण शहरात हळहळ व्यक्त करण्यात येत आहे. याबाबतची अधिक माहिती अशी की, मकर संक्रांतीनिमित्त शहरभर सर्वत्र पतंग उडविणार्यांची धामधूम सुरू होती. याच धामधुमीमध्ये दुपारच्या वेळेस मोरगेवस्ती भागातही मोठ्या प्रमाणावर तरुण हे पतंग उडवित होते.
यामध्ये मोरगेवस्ती येथे राहणारा भूषण शरद परदेशी हाही एका बिल्डींगच्या तिसर्या मजल्यावर पतंग उडवित होता. पतंग उडवित असतांनाच्या नादात सायं. 5 च्या सुमारास भूषण परदेशी याचा मागे सरकत असतांना तोल गेल्याने थेट खाली तिसर्या मजल्यावरून कोसळला. यामध्ये तो गंभीर जखमी झाला. भूषण परदेशी हा बिल्डींगवरून खाली पडल्याचे समजताच गच्चीवरील पतंग उडविणार्या आणि खाली असणार्या लोकांनी तातडीने त्याला उपचारासाठी शहरातील साखर कामगार रुग्णालयात हलविले. परंतु त्याला तिसर्या मजल्यावरून पडल्याने गंभीर मार लागलेला असल्याने भूषण परदेशी याचा उपचारादरम्यान मृत्यू झाल्याचे समजते.
पत्रा निसटल्याने घडली घटना…
मोरगेवस्ती परिसरातील काही नागरीकांच्या मते भूषण हा पतंग उघवित असताना मागे सरकला. त्यावेळी ज्या जुन्या बिल्डींगवर तो पतंग उडवित होता. त्या बिल्डींगला लिफ्ट लावण्यासाठी जागा (बोगदा) सोडण्यात आली आहे. त्यावर पत्रा टाकलेला होता.पतंग उडविण्याच्या नादात या पत्र्यावर भूषण याचा पाय पडला. त्यामुळे पत्रा निसटून भूषण थेट तिसर्या मजल्यावरून खाली पडल्याचे प्रत्यक्षदर्शीनी सांगितले.
