भाळवणी : पुढारी वृत्तसेवा : पारनेर तालुक्यातील ग्रामपंचायत निवडणुकांचा धुराळा शांत होत नाही तोच शुक्रवारी (दि.6) भाळवणी येथे दोन गटात राडा झाला. यात शिवसेना शिंदे गटाचे तालुकाप्रमुख विकास उर्फ बंडू रोहोकले यांच्या पेट्रोल पंपाच्या केबिनच्या काचा फुटल्या. दोन्ही गटाने दिलेल्या परस्परविरोधी तक्रारीवरून दोन गुन्हे दाखल करण्यात आले आहे. निवडणुकीत विरोधी असलेल्या उमेदवाराशी चर्चा करीत असताना झालेल्या शिवीगाळीतून दोन गट एकमेकांना भिडले. त्यातून परस्परविरोधी गुन्हे दाखल करण्यात आले असून, शिंदे गटाचे तालुकाप्रमुख विकास रोहोकले यांच्यावर विनयभंगाचा गुन्हा दाखल करण्यात आला आहे.
गुरुवारी (दि.5) रात्री विकास रोहोकले त्यांच्या कल्याण रस्त्यावरील पेट्रोल पंप येथील ऑफिसमध्ये कामकाज पाहत असताना अविनाश सूर्यकांत रोहोकले तेथे आला. पंपावर असलेल्या कर्मचार्यांशी तो विनाकारण वाद घालू लागला. त्यापाठोपाठ तेथे दत्तात्रय केरूभाऊ रोहोकले, दीपक भागुजी रोहोकले, सूर्यकांत केरूभाऊ रोहोकले यांनी वाद घालून मारहाण सुरू केली. त्यापैकी एकाने तेथे असलेला पेव्हिंग ब्लॉक उचलून कार्यालयाच्या काचेवर फेकून मारल्याने काच फुटली. तसेच पंपावर कामास असलेल्या संदीप पांडुरंग रोहोकले यांच्याकडील एक लाख, दिलीप पांडुंरंग रोहोकले यांच्याकडील दोन तोळे सोने घेतले व पंपाची तोडफोड करून ते तेथून निघून गेल्याचे विकास रोहोकले यांनी फिर्यादीत म्हटले आहे.
दुसरी फिर्याद महिलेने दाखल केली असून त्यात म्हटले आहे की, रात्री साडेआठच्या सुमारास विकास भाऊसाहेब रोहोकले दोन पांढर्या गाड्यांसह त्यांच्या घराजवळ आला. दुसर्या गाडीत जयसिंग रोहोकले, अक्षय रोहोकले, नामदेव रोहोकले होते. विकासने घरात येऊन महिलेच्या साडीचा पदर ओढून विनयभंग केला. तसेच आरडाओरडा केल्यानंतर बाहेर जाताना चापट मारून गळ्यातील दीड तोळ्याचे गंठण घेऊन पळून गेला. पुढील तपास पोलिस निरीक्षक घनश्याम बळप यांच्या मार्गदर्शनाखाली पोलिस उपनिरीक्षक जावळे करीत आहेत.
