संगमनेर शहर; पुढारी वृत्तसेवा : तालुक्यातील श्रीक्षेत्र देवगड येथील खंडोबा देवस्थानच्या परिसर विकासासाठी तीर्थक्षेत्र विकास योजनेतून 2 कोटी रुपयांचा निधी उपलब्ध करून देणार असल्याची माहिती महसूल तथा पालकमंत्री राधाकृष्ण विखे पाटील यांनी दिली.
प्रति जेजुरी म्हणून ओळखल्या जाणार्या श्रीक्षेत्र खंडोबा देवस्थानचा यात्रा उत्सव माघी पौर्णीमेला सुरू झाला. यात्रेच्या पहिल्याच दिवशी मंत्री विखे पाटील यांच्या हस्ते श्री खंडोबाची महाआरती करण्यात आली. देवस्थानच्या वतीने स्मृतिचिन्ह देऊन सत्कार करण्यात आला.
याप्रसंगी धर्मदाय आयुक्त उषा पाटील, संगमनेर तालुका दूध संघाचे चेअरमन रणजित देशमुख, देवस्थानचे अध्यक्ष सगाजी पावसे, भाजपाचे तालुकाध्यक्ष सतिष कानवडे, शहर अध्यक्ष श्रीराम गणपुले, सोमनाथ कानवडे, गुलाबराव सांगळे, काशिनाथ पावसे, भीमराज चतर, जावेदभाई जहागिरदार, अमोल खताळ, सोमनाथ दवंगे, किशोर दवंगे, किशोर नावंदर, अॅड. पोपट वाणी, गोकुळ दिघे यांच्यासह सर्व विभागांचे अधिकारी उपस्थित होते.
मंत्री विखे म्हणाले की, या गावाला अध्यात्मिक महत्त्व असल्याने दरवर्षी भाविक मोठ्या संख्येने उपस्थित राहतात. परंतु या तीर्थक्षेत्राची महती अधिक वाढवायची असेल तर या परीसरातील विकसाला गती द्यावी लागेल. त्यामुळे या देवस्थानचा 'ब' वर्गामध्ये समावेश करण्याची ग्वाही देवून तिर्थक्षेत्र विकास योजनेतून 2 कोटी रुपये उपलब्ध करून देणार असल्याचे त्यांनी सांगितले. मुख्य महामार्गापासून देवस्थानकडे येणार्या रस्त्याच्या कामाला प्राधान्य देताना या मार्गावरील पुलाच्या कामाला निधी देण्याचे आश्वासन मंत्री विखे यांनी दिले.
