पारनेर : पुढारी वृत्तसेवा : पारनेरच्या तहसीलदार गायत्री सौंदाणे यांची ऑडिओ क्लिप सध्या तालुक्यात चांगलीच चर्चेत असून, त्यात विविध विभागांतील अधिकार्यांना पैसे जमा करण्याच्या सूचना केल्याने चांगलीच खळबळ उडाली आहे. दरम्यान, तहसीलदार सौंदाणे यांनी या ऑडिओ क्लिपशी आपला संबंध नसून, त्यातील आवाजही माझा नसल्याचे स्पष्ट केले आहे. पारनेर येथे झालेल्या महसूलमंत्र्यांच्या कार्यक्रमासाठी तहसीलदार सौंदाणे यांनी तालुक्यातील अधिकार्यांकडून पैसे जमा केल्याची ऑडिओ क्लिप सध्या व्हायरल होत आहे. त्यात प्रत्येक कार्यालयातून 10 ते 20 हजार रूपये जमा करण्याच्या सूचना अधिकार्यांना केल्याचे क्लिपवरून दिसते.
तहसीलदार सौंदाणे यांची तालुक्यातील कारकीर्द वादग्रस्त ठरत आहे. यापूर्वी त्यांनी थम्ब व इतर कागदपत्रांसाठी कार्यालयातील एजंटमार्फत पैशांची मागणी केल्याच्या तक्रारी आहेत. त्यातच थेट महसूलमंत्र्यांच्या पारनेर येथे झालेल्या शासन आपल्या दारी कार्यक्रमासाठी पंचायत समिती, नगरपंचायत, कृषी विभाग, पशुवैद्यकीय विभाग आदी विभागाच्या अधिकार्यांकडून वसुलीसाठी सूचना करून पैसे त्वरित जमा करण्याचे फर्मान सोडल्याचे क्लिपमधील आवाजावरून दिसते. यात एका अधिकार्याने शासकीय अनुदान नाही का, असे म्हटल्यावर त्यांनी यासाठी कोणतेही अनुदान येत नाही. आम्ही मागच्या वेळेस पगारातूनच पैसे घातले आहेत. त्यासाठी कोणते अनुदान येत नाही, असे सांगितले.
अधिकार्यांच्या बैठकीत सौंदाणे म्हणाल्या, या कार्यक्रमासाठी मंडप, बुके, सत्कार आदींसाठी खर्च केला आहे. त्यासाठी आपल्याला पैसे गोळा करावेच लागतील. ज्यांना पैसे गोळा करायचे नाहीत, त्यांनी जबाबदारी वाटून घ्यावी. मंडप, बुके इत्यादी जबाबदारी घ्यावी. यासाठी शासनाकडून कोणतेही अनुदान येत नसल्याचे व्हिडिओमध्ये बोलले असल्याचे स्पष्ट होत आहे.
सत्यता पडताळून कारवाई करू
तहसीलदार गायत्री सौंदाणे यांच्याशी चर्चा केली. त्यांच्या म्हणण्यानुसार कोणीतरी ऑडिओ क्लिप बनविली असून, ब्लॅकमेल करण्याचा प्रयत्न करत असल्याचे त्यांचे म्हणणे आहे. मात्र, ऑडिओ क्लिप संभाषण चौकशीचे आदेश आल्यास त्याबाबतची सत्यता पडताळू. त्यात तथ्य असल्यास कारवाई केली जाईल, असे पारनेर-श्रीगोंदा विभागाचे प्रांताधिकारी गणेश राठोड यांनी सांगितले.
ऑडिओ क्लिपमध्ये माझा आवाज नाही. ती क्लिप माझी नाही. माझा त्या ऑडिओ क्लिपशी काही संबंध नाही. मी अशी कोणाकडेही मागणी केलेली नाही.
– गायत्री सौंदाणे, तहसीलदार, पारनेर
