अहमदनगर; पुढारी वृत्तसेवा : खोटी कागदपत्रे तयार करून सातबारा उतार्यावर नावे घेत जमिनीची खरेदी-विक्री केल्याप्रकरणी अतिरिक्त जिल्हाधिकार्यासह 32 जणांवर गुन्हा दाखल करण्यात आला आहे. लाचलुचपत प्रतिबंधक विभागाने ही कारवाई केली असून, यामध्ये महसूल विभागाच्या अधिकारी-कर्मचार्यासह काही खासगी व्यक्तींचा समावेश आहे.
नगर शहराजवळील वडगाव गुप्ता शिवारातील (गट नं.203 क्षेत्र 2 हेक्टर 97 आर) एक हेक्टर 34 आर ही कनिष्ठ महार वतन हाडोळा इनाम वर्ग 6 ची जमीन आहे. ती जुन्या शर्तीवर करण्यासाठी अटी व शर्तीवर तत्कालीन तहसीलदारांनी बेकायदेशीर परवानगी दिली. त्यास तहसीलदार एल. एन. पाटील, तलाठी एल. एस. रोहकले, तत्कालीन मंडल अधिकारी दुर्गे यांनी मदत केली.
तसेच, जमिनीच्या खरेदी-विक्री व्यवहाराच्या नियमबाह्य फेरफार नोंदी घेऊन उत्कर्ष पाटील व अजित कड यांना मदत केली. तत्कालीन अपर जिल्हाधिकारी व्ही. टी. जरे व उपविभागीय अधिकारी राजेंद्र मुठे यांना सदर आदेश बेकायदेशीर असल्याची माहिती असूनही, त्यांनी कुठलीही कारवाई केली नाही. तत्कालीन सहायक दुय्यम निबंधक दिलीप बबन निराली यांनी खरेदी-विक्रीचे बेकायदेशीरपणे दस्त नोंदविले असल्याचे तक्रारदार यांनी अर्जात म्हटले आहे.
सदरची जमीन ही महार वतन हाडोळा इनाम वर्ग 6 ब ची असल्याची माहिती असताना देखील सर्वांनी मिळून खोटी कागदपत्रे तयार केली व जमिनीच्या खरेदी-विक्रीचे व्यवहार करून शासनाची फसवणूक केली. लाचलुचपत प्रतिबंधक विभागाने तत्कालीन अतिरिक्त जिल्हाधिकार्यासह एकूण 32 जणांविरूद्ध गुन्हा दाखल केला. पुढील तपास लाचलुचपत विभागाचे पोलिस उपअधीक्षक प्रवीण लोखंडे करीत आहेत.
हेही वाचा
