Nagar News : पतसंस्थांप्रश्नीमंत्र्यांचे अनुकूल निर्णय : काका कोयटे

कोपरगाव : पुढारी वृत्तसेवा : सहकार मंत्री दिलीप वळसे पा. यांच्या उपस्थितीत आ. सत्यजित तांबे यांच्या पुढाकाराने सहकारी पतसंस्थांच्या विविध प्रश्नांबाबत मंत्रालयात बैठक पार पडली. यावेळी पतसंस्थांच्या विविध प्रश्नांवर सकारात्मक निर्णय घेतल्याची माहिती महाराष्ट्र राज्य सहकारी पतसंस्था फेडरेशनचे अध्यक्ष काका कोयटे यांनी दिली. थकबाकी वसुलीची यंत्रणा गतिमान करण्याचा, महाराष्ट्र सहकारी संस्था अधिनियम 1960 व 1961 मधील कायदा कलम 101 चे वसुलीचे दाखले केवळ 3 महिन्यांत मिळावे, वसुली दाखल्यासाठी प्रस्ताव दाखल करणे व त्याचा निकाल 90 दिवसात देणे, वसुलीची सर्व यंत्रणा ऑनलाईन करणे, कायदा कलम 101 चा दाखला मिळाल्यानंतर त्यावर 50 टक्के रक्कम भरल्याशिवाय अपील दाखल करून घेऊ नये. असे अपील दाखल झाल्यास संबंधित अधिकार्‍यावर कारवाई करण्याचा निर्णय घेण्यात आला.

वसुली दाखले मिळाल्यानंतर वाजवी मूल्यांकन मिळण्यासाठी कर्जदारांनी मागणी केलेल्या रकमेस ती मालमत्ता विकण्यास कर्जदारास 1 महिन्याचा कालावधी देण्यात यावा, अन्यथा संस्थेने मागितलेले मूल्यांकन सहकार खात्याने मान्य करावे. वाजवी मूल्यांकनास 6 महिने मुदतीऐवजी 1 वर्ष मुदत घेणे. अपसेट प्राईस देण्यासंबंधीचे जिल्हा उपनिबंधकांचे अधिकार स. निबंधकाला देण्याचा निर्णय, भागधारण करण्याची वैयक्तिक मर्यादा 1 लाखावरून 5 लाख रुपये करावी, शासकीय कर्ज रोख्यात गुंतवणूक करण्यास परवानगी द्यावी आदी मागण्या करण्यात आल्या.

सहकारी पतसंस्थांच्या ठेवींना विमा संरक्षण मिळण्यास सहकार खात्याने तयार केलेल्या प्रस्तावाबाबत खास बैठक बोलावून पतसंस्था फेडरेशनचे म्हणणे विचारात घेऊन निर्णय घेतला जाईल, असे सहकार मंत्री वळसे पा. यांनी जाहीर केले. वसुलीबाबत ऑनलाईन यंत्रणेचा दैनंदिन आढावा स्वतः घेणार असल्याचे यावेळी सहकार आयुक्त अनिल कवडे म्हणाले. अंशदान न घेता पतसंस्थांच्या ठेवींना संरक्षण देण्याचे सादरीकरण चित्रफितीच्या माध्यमातून महाराष्ट्र राज्य सहकारी पतसंस्था फेडरेशनचे अध्यक्ष काका कोयटे यांनी केले असता, यावर मंत्री वळसे यांनी प्रभावित होत याबाबत सकारात्मकता दर्शविल्याची माहिती राज्य सहकारी पतसंस्था फेडरेशनचे संचालक भास्करराव बांगर यांनी दिली.

बैठकीस राज्य सहकारी पतसंस्था फेडरेशनचे अध्यक्ष ओमप्रकाश दादाप्पा तथा काका कोयटे, संस्थापक वसंतराव शिंदे, संचालक भास्करराव बांगर, आ. डॉ. सत्यजीत तांबे, अमित बेनके, पतसंस्था फेडरेशनच्या कार्यकारी संचालिका सुरेखा लवांडे, सचिव अनुप कुमार, सहकार आयुक्त अनिल कवडे, आयुक्त वाडेकर, आयुक्त कार्यालयाचे जिल्हा उपनिबंधक मिलिंद सोबले यांच्यासह पत संस्था फेडरेशनचे पदाधिकारी उपस्थित होते.

वेअर हाऊसेस व कोल्ड स्टोरेज ला हिरवा कंदील..!
गेली अनेक वर्षे सहकारी पतसंस्थांना वेअर हाऊसेस व कोल्ड स्टोरेज बांधण्यास परवानगी देण्याची मागणी महाराष्ट्र राज्य सहकारी पतसंस्था फेडरेशन सहकार खात्याकडे करीत होते. याबाबत सहकार मंत्री वळसे यांनी सहकार खात्याला परवानग्या देण्याचे निर्देश दिले.