पाथर्डी तालुका; पुढारी वृत्तसेवा : शहरातील सराफ व्यावसायिकावर धारदार शास्त्राने वार करून लुटणार्या तीन संशयित आरोपींच्या पाथर्डी पोलिसांनी मुसक्या आवळल्या आहेत. पोलिसांविरोधात काढण्यात आलेल्या मूक मोर्चानंतर चोवीस तासांच्या आत आरोपींना पोलिसांनी ताब्यात घेतले आहे. विशाल शिवाजी एडके (रा.पाथर्डी) , दीपक दत्तात्रय राख (रा. अहमदनगर) व दीपक तोताराम सोमनकर (रा. रघुहिवरे) अशी या आरोपींची नावे आहेत. गुरुवारी रात्री सव्वा आठच्यासुमारास शहरातील सराफ व्यावसायिक बंडू उर्फ राजेंद्र चिंतामणी यांच्या डोक्यावर धारदार शस्त्राने वार करून चोरट्यांनी त्यांना जखमी केले. त्यांच्या स्कूटी गाडीतील पिशवी काढून घेत आरोपी पसार झाले.
या घटनेनंतर शहरातील व्यापारी, सर्वपक्षीय नेते व कार्यकर्त्यांनी पोलिसांच्या विरोधात मोर्चा काढत कारभाराविषयी ताशेरे ओढले. त्यानंतर गुन्ह्याचे गांभीर्य ओळखून शनिवारी पोलिसांनी धडक कारवाई करीत आरोपींना अटक केली. चोरीच्या उद्देशानेच हा गुन्हा केल्याची माहिती आरोपींनी पोलिसांना दिली. गुन्हा घडल्यानंतर संशयाची सुई नातेवाईकांकडे जात होती. मात्र, पोलिसांनी योग्य तपास करून खर्या आरोपींना गजाआड केले आहे.
पोलिस निरीक्षक सुहास चव्हाण, सहाय्यक निरीक्षक प्रवीण पाटील, रामेश्वर कायंदे, उपनिरीक्षक श्रीकांत डांगे, सचिन लिमकर यांनी पोलिसांची तीन पथके तयार केली. या पथकातील पोलिस कर्मचारी भगवान सानप, ज्ञानेश्वर रसाळ, संदीप कानडे, देविदास तांदळे, नीलेश म्हस्के, अतुल शेळके, नारायण कुटे, राहुल तिकोणे, लक्ष्मण पवार, कुमार कराड, किशोर पालवे, कृष्णा बडे, ईश्वर बेरड, संदीप गर्जे, अक्षय लबडे यांनी आरोपींच्या मुसक्या आवळल्या. तिघा आरोपींनी चिंतामणी यांना लुटले, तर एक आरोपी चिंतामणी यांची पंधरा दिवसांपासून रेकी करीत असल्याचे चौकशीत उघड झाले आहे.
पिशवीत सोन्याऐवजी चाव्याळ
सराफ व्यावसायिक चिंतामणी हे आपल्या दुकानातून घराकडे दुचाकीवर जातात. त्यांच्याकडे असलेल्या पिशवीत दुकानाच्या चाव्या असतात. मात्र, आरोपींना त्या पिशवीत सोने असल्याचा संशय होता. त्यामुळे चोरांनी ती पिशवी नेली, त्यात फक्त दुकानाच्या चाव्या निघाल्या. गेल्या पंधरा दिवसांपासून एक आरोपी रेकी करत होता.
रेकी करणारा आरोपी पसार
हा गुन्हा घडल्यानंतर नातेवाईकांनीच हा प्रकार घडवून आणल्याचा सूर होता. मात्र, पोलिसांनी खर्या आरोपींना जेरबंद केल्याने या चर्चेवर पडदा पडला आहे. या घटनेत एकूण चार आरोपी असल्याची माहिती पुढे येत आहे. यातील तिघांनी हा गुन्हा केला, तर चिंतामणी यांची रेकी करणारा एक आरोपी अद्याप पसार आहे.
