पाथर्डी तालुका : पुढारी वृत्तसेवा : पाथर्डी तालुक्यातील अकरा ग्रामपंचायतच्या निवडणुकीसाठी शांततेत मतदान पार पडले.एकूण 26 हजार 628 पैकी 21 हजार 106 मतदारांनी आपला मतदानाचा हक्क बजावला. त्यामुळे एकूण 79.26 टक्के मतदान झाले आहे. स्थानिक पातळीवरच्या ग्रामपंचायत निवडणुकीसाठी चांगली चुरस सकाळपासून पाहायला मिळाली. एकमेकांच्या विरोधात असणार्या उमेदवार व कार्यकर्त्यांची ठिकठिकाणी किरकोळ शाब्दिक वादावादी वगळता सर्वत्र शांततेत मतदान पार पडले. या ग्रामपंचायतीच्या निवडणुकीत सरपंच पदाच्या अकरा जागांसाठी 33 उमेदवार, तर ग्रामपंचायत सदस्यांच्या एकशे नऊ जागांपैकी नऊ जागा बिनविरोध झाल्या असून, उर्वरित शंभर जागांसाठी 240 उमेदवारांचे भवितव्य मतदान यंत्रात बंद झाले आहे.
सकाळी साडेसात वाजता सुरू झालेले मतदान सायंकाळी साडेपाच वाजेपर्यंत सुरू होते. साडेपाच वाजण्याच्या सुमारास आलेल्या मतदारांना मतदान करण्यास वेळ लागल्याने मतदान प्रक्रिया पूर्ण करण्याला काही ठिकाणी विलंब झाला. सकाळपासूनच मतदारांची मतदान केंद्रावर मतदान करण्यासाठी गर्दी होती. तालुक्यातील पूर्व भागातील ग्रामपंचायतीचे मतदार परगावी ऊस तोडणीसाठी गेले असल्याने, त्यांना मतदानाच्या दिवशी गावी मतदान करण्यासाठी आणताना उमेदवारांना मोठी धावपळ करावी लागली.
वडगाव, सोनोशी, कोळसांगवी, वैजूबाभूळगाव, मोहरी, कोल्हार, जिरेवाडी, निवडुंगे, कोरडगाव, भालगाव, तिसगाव अशा एकूण अकरा गावांतील 26 हजार 628 मतदारा पैकी 21 हजार 106 एवढ्या मतदारांनी मतदान केले. त्यामध्ये पुरुष 11 हजार 414, तर 9 हजार 692 स्त्रियांनी मतदानाचा हक्क बजावला. मंगळवारी 20 डिसेंबर रोजी सकाळी 10 वाजल्यापासून तहसील कार्यालयात मतमोजणीला सुरुवात होणार आहे. अकरा ग्रामपंचायतच्या निवडणुकी दरम्यान कुठेही मतदान यंत्र बंद पडले नाही. त्यामुळे प्रशासनास मतदान प्रक्रिया सुरळीत पार पाडता आली.
गाव निहाय झालेले मतदान
वडगाव 1720 (2184), भालगाव 3097 (3921), सोनोशी 1155 (1463), कोळसांगवी 709 (848), कोरडगाव 2397 (2977), वैजूबाभूळगाव 980 (1137), मोहरी 1670 (2009), कोल्हार 1572 (2294), जिरेवाडी 1015 (1304), निवडुंगे 2598 (3250 ), तिसगाव 4193 (5241).
