कर्जत : पुढारी वृत्तसेवा : राष्ट्रवादी काँग्रेसचे आमदार रोहित पवार यांना राजकीय धक्के सुरूच आहेत. माजी उपनगराध्यक्ष बापूसाहेब नेटके यांनी समर्थकांसह राष्ट्रवादी काँग्रेसमधून मुख्यमंत्री एकनाथ शिंदे यांच्या उपस्थितीमध्ये बाळासाहेबांच्या शिवसेनेत प्रवेश केला.
यावेळी शिवसेनेच दनगर दक्षिण जिल्हाप्रमुख बाबूशेठ टायरवाले उपस्थित होते. यावेळी कर्जत तालुकाप्रमुखपदी बापूसाहेब नेटके व तालुका उपप्रमुख म्हणून सुभाष धस यांची निवड जाहीर करण्यात आली. श्री नेटके मागील पाच वर्षांत पंचायत समितीचे उपसभापती होते. या काळात त्यांनी चांगला जनसंपर्क वाढविला. याचप्रमाणे ते कर्जतचे माजी उपनगराध्यक्षही होते, भाजपचे एकमेव सदस्य असताना देखील त्यांनी त्यावेळी उपसभापतिपद मिळवत भाजपचा झेंडा पंचायत समितीवर फडकावला होता.
आमदार पवार यांच्यावर टीका करताना नेटके म्हणाले की, आपण भाजपामध्ये होतो. त्यावेळी पक्ष सोडताना भाजपचे पदाधिकारी किंवा माजी मंत्री राम शिंदे यांच्या समवेत मतभेद नव्हते. मात्र, अडीच वर्षांपूर्वी राष्ट्रवादी काँग्रेसमध्ये प्रवेश केला तो आमदार रोहित पवार यांच्याकडे पाहूनच आणि मतदारसंघातील विकासकामे मोठ्या प्रमाणात होतील, या अपेक्षेने केला होता. परंतु अडीच वर्षांमध्ये माझा भ्रमनिरास झाला. कार्यकर्ता म्हणून त्या पक्षात काम केले. मात्र, मला अडगळीत असल्यासारखे वाटले. मान-सन्मान कधी मिळाला नाही. आमदार पवार यांचे काम करण्याची पद्धत कार्यकर्त्यांची खच्चीकरण करणारी आहे.प्रत्येक जण आपल्या मुठीमध्ये राहिला पाहिजे, अशी कार्यपद्धती मला आवडली नाही. कार्यकर्त्यांची काम होत नव्हती. कामे घेऊन येणार्या नागरिकांना काय उत्तर द्यायचे हा प्रश्न निर्माण झाला होता.
नेटके म्हणाले, मुख्यमंत्री एकनाथ शिंदे यांची कार्यपद्धती चांगली आहे. एक रिक्षाचालक राज्याचा मुख्यमंत्री झाला आहे. त्यामुळे सर्वसामान्य कार्यकर्त्याला प्रेमाची आणि आदराची वागणूक मिळत आहे. प्रवेशाच्या वेळी त्यांनी माझ्या खांद्यावर हात टाकून विचारपूस केली. आगामी काळात कर्जत तालुक्यात बाळासाहेबांची शिवसेना प्रत्येक वाडी-वस्तीवर शाखा काढून वाढविणार आहोत.
