संगमनेर शहर : पुढारी वृत्तसेवा : काँग्रेस पक्षाचे विधी मंडळ नेते माजी महसूल मंत्री बाळासाहेब थोरात यांच्या मार्गदर्शनाखाली सहकारातून समृद्धी निर्माण करत विकासाचे मॉडेल ठरलेल्या संगमनेर तालुक्याने यंदाही सेवा सोसायट्यांमध्ये कर्ज फेडीची परंपरा कायम ठेवत तब्बल 99.82 टक्के विक्रमी वसुली देत जिल्ह्यात प्रथम क्रमांक पटकाविल्याची माहिती तालुका विकास अधिकारी अशोक थोरात यांनी दिली.
सहकार हे गोरगरिबांच्या विकासाचे महत्त्वपूर्ण माध्यम आहे. सहकार महर्षी स्व. भाऊसाहेब थोरात यांच्या आदर्श तत्त्वांवर संगमनेर तालुक्याने सहकारातून समृद्धी निर्माण केली. राज्याचे नेते आ. बाळासाहेब थोरात यांच्या नेतृत्वाखाली संगमनेर तालुका विकासातून सर्व क्षेत्रांत अग्रभागी राहिला आहे. अहमदनगर जिल्हा सहकारी बँक जिल्ह्याची आर्थिक कामधेनू आहे. सेवा सोसायटींच्या माध्यमातून शेतकरी, गोरगरीब यांना बँकेने सातत्याने कर्ज पुरवठा केला आहे.
आ. बाळासाहेब थोरात यांच्या नेतृत्वामुळे या बँकेवर जिल्ह्यातील सर्व सभासद, ठेवीदार, शेतकरी यांचा मोठा विश्वास आहे. संगमनेर तालुक्याने आपल्या कर्जफेडीची उज्ज्वल परंपरा कायम ठेवत तालुक्यातील 17 सेवा सोसायट्यांनी मेंबर पातळीवर शंभर टक्के वसुली दिली.
या कर्ज वसुलीसाठी शेतकर्यांमध्ये सातत्याने प्रबोधन करताना आ. बाळासाहेब थोरात, आ. डॉ. सुधीर तांबे, चेअरमन उदय शेळके यांच्या मार्गदर्शनाखाली जिल्हा बँकेचे उपाध्यक्ष अॅड. माधवराव कानवडे, संचालक गणपतराव सांगळे, मुख्य कार्यकारी अधिकारी रावसाहेब वर्पे, तालुका विकास अधिकारी अशोक थोरात, वसुली अधिकारी उल्हास शिंदे, तालुका सचिव प्रकाश कडलग यांच्यासह विविध पदाधिकार्यांनी गावोगावी सातत्याने बैठका घेऊन कर्ज वसुलीसाठी विशेष परिश्रम घेतले. यामुळे तालुक्याची कर्ज वसुली तब्बल 99.82 टक्के एवढी उच्चांकी झाली आहे.
वसुली कामांमध्ये संगमनेर तालुक्यातील सर्व सेवा सोसायट्यांचे चेअरमन, व्हा. चेअरमन, संचालक मंडळ, सचिव, जिल्हा बँकेचे शाखाधिकारी, अधिकारी व कर्मचार्यांनी विशेष परिश्रम घेतले. सहकार महर्षी भाऊसाहेब थोरात साखर कारखाना, संगमनेर तालुका दूध संघ, शेतकी संघ, मार्केट कमिटी या संस्थांनीही कर्जदार शेतकर्यांचा वसुली करण्यासाठी मोलाचे सहकार्य केले.
जिल्हा बँकेच्या या वसुलीच्या परंपरेबद्दल आ. बाळासाहेब थोरात, आ. डॉ. सुधीर तांबे, बाजीराव पा. खेमनर, अॅड. माधवराव कानवडे, गणपतराव सांगळे, इंद्रजित थोरात, डॉ. जयश्रीताई थोरात, दुर्गाताई तांबे, रणजितसिंह देशमुख, सत्यजित तांबे, बाबा ओहोळ, शंकरराव खेमनर, संपतराव डोंगरे आदी पदाधिकार्यांनी अभिनंदन केले आहे.
17 सेवा सोसायट्यांनी मेंबर पातळीवर शंभर टक्के वसुली दिली. यामध्ये निंबाळे, घुलेवाडी, मालदाड, कुंभारवाडी, जोर्वे, शिरसगाव धुपे, आनंदवाडी, पिंपळगाव माथा, देवकौठे , कौटेवाडी, आंबी दुमाला, म्हसवंडी, वडझरी, खराडी, चिखली, मिरपूर, निमगाव भोजापूर या गावांचा समावेश आहे, तर इतर 133 सेवा सोसायट्यांनी बँक पातळीवर शंभर टक्के वसुली दिली आहे. यामुळे तालुक्याची वसुली 99.82 टक्के राहिली. अहमदनगर जिल्ह्यातून संगमनेर तालुक्याने कर्ज वसुलीमध्ये प्रथम क्रमांक मिळवून एक आदर्श निर्माण केला आहे.
