Cabinet Expansion : एकनाथ शिंदे- अमित शहांच्या भेटीत मंत्रिमंडळ विस्ताराचा फॉर्म्युला ठरला!

By:Sonali Jadhav Published on: June 30, 2023, 12:23 PM

नवी दिल्ली, पुढारी वृत्तसेवा : केंद्रात मंत्रिमंडळ विस्ताराचे वारे वाहत असताना मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी गुरूवारी (दि.२९) रात्री उशिरा केंद्रीय गृहमंत्री अमित शहा यांची भेट घेतली. रात्री उशिरा पर्यंत चालेल्या बैठकीनंतर केंद्रीय मंत्रिमंडळात शिंदे गटाला एक कॅबिनेट आणि एक राज्यमंत्री पद मिळण्याची शक्यता वर्तवली जात आहे. बैठकी दरम्यान कुणाला मंत्रीपद द्यायचे याचा निर्णय सर्वस्वी शिंदेंवर सोडण्यात आल्याचे कळते. शहा यांच्यासोबत झालेल्या बैठकीत राज्य मंत्रिमंडळ विस्ताराचा फॉर्म्युला ठरल्याची ही चर्चा आहे. बैठकीनंतर शिंदे-फडणवीस रात्रीच मुंबईला परतले. (Cabinet Expansion)

Cabinet Expansion : सार्वत्रिक निवडणुकीच्या पार्श्वभूमीवर

अवघ्या काही महिन्यांवर येवून ठेपलेल्या सार्वत्रिक निवडणुकीच्या पार्श्वभूमीवर केंद्रीय मंत्रिमंडळात शिंदे गटाला स्थान देवून खासदारांमधील खदखद कमी करण्याचा तसेच राज्य मंत्रिमंडळाच्या विस्ताराचा मार्ग मोकळा करीत आमदारांमधील अस्वस्थता कमी करण्याचा प्रयत्न भाजपचा असल्याचे यानिमित्ताने बोलले जात आहे.

पंढरपूर येथे सर्व विधी आणि पूजा संपवून मुख्यमंत्री आणि उपमुख्यमंत्र्यांनी थेट दिल्ली गाठले होते. विमानतळावरून उभय नेत्यांनी थेट कृष्ण मेनन मार्गावरील अमित शहा यांचे निवासस्थान गाठले. दिल्लीतील दौरा अत्यंत गोपनीय ठेवण्यात आल्याने मुख्यमंत्री-उपमुख्यमंत्र्यांनी प्रोटोकाॅल देखील घेतला नव्हता. राज्यातील जाहिरात बाजीच्या प्रकरणामुळे भाजप पक्ष श्रेष्ठींची नाराजी ओढवल्यानंतर शिंदे यांनी पहिल्यांदाच शहा यांच्यासोबत अशाप्रकारची वैयक्तिक भेट घेतली, हे विशेष.

हेही वाचा