पंकजा ताईंना मंत्रीपद मिळाले तर आनंदच : धनंजय मुंडे

परळी वैजनाथ; पुढारी वृत्तसेवा : पंकजा मुंडे यांना मंत्री पद मिळेल का ? पत्रकारांच्या या प्रश्नावर प्रतिक्रिया देताना मंत्रिपद देणे अथवा न देणे हा सर्वस्वी त्यांच्या पक्षाचा निर्णय आहे, मात्र ताईंना मंत्रिपद मिळाले व या भागाचा विकास होणार असेल तर आम्हाला त्याचा आनंदच आहे, असे धनंजय मुंडे यांनी सांगितले.

• India @ 75 : तिरंग्यासोबत सेल्फी, पहा फोटोज

धनंजय मुंडे यांच्या संकल्पनेतून परळी नगर परिषदेच्या माध्यमातून वैद्यनाथ कॉलेज वरील डोंगरावर राष्ट्रभक्तीचे स्फूर्तीस्थळ साकारले असून, याठिकाणी मराठवाड्यातील सर्वात उंच, तब्बल 150 फूट उंचीचा तिरंगा ध्वज उभारण्यात आला आहे. या तिरंगा ध्वजाचे लोकार्पण करण्यात आले. या समारंभात बोलताना धनंजय मुंडे यांनी सांगितले की, परळी मतदारसंघाचा विकासात्मक व राजकीय दर्जा वाढवून परळीचा नावलौकिक व दबदबा दिल्लीत आणि मुंबईत वाढावा यासाठी आम्ही प्रामाणिक प्रयत्न करत आहोत. सरकारकडून स्वातंत्र्याच्या अमृत महोत्सवानिमित्त 'हर घर तिरंगा' अभियान राबविण्यात येत असले तरी आम्ही मात्र काही महिने अगोदरच या विशाल तिरंगा ध्वज उभारणीचे व 15 ऑगस्टच्या काळात लोकार्पण करण्याचे नियोजन केले होते. परळीत येणाऱ्या प्रत्येकाला या स्थळाची भुरळ पडेल, असे काम केले जाईल, असेही धनंजय मुंडे यांनी सांगितले.

• माझ्या बाबतीतील 'नाराजी' दूर करा: पंकजा मुंडे

या कार्यक्रमास माजी आ. संजय दौंड, माजी आ. पृथ्वीराज साठे, अतिरिक्त जिल्हाधिकारी मंजुषा मिस्कर, ॲड. राजेश्वर चव्हाण, लक्ष्मणर पौळ, बाजीराव भैय्या धर्माधिकारी, उपविभागीय अधिकारी नम्रता चाटे, अप्पर पोलिस अधीक्षक श्रीमती नेरकर, तहसीलदार सुरेश शेजुळ, नगर परिषद मुख्याधिकारी तथा प्रशासक सुंदर बोंदर, बीडीओ संजय केंद्रे, पोलीस निरीक्षक उमाशंकर कस्तुरे, सुरेश चाटे, स.पो.नि. महेंद्रसिंह ठाकूर, तालुका वनाधिकारी भगवान गित्ते, महसूल, पोलीस आदी विभागाचे कर्मचारी, प्राध्यापक वृंद, यांसह पदाधिकारी, अधिकारी – कर्मचारी, एनसीसीचे विद्यार्थी, शालेय विद्यार्थी व परळीतील नागरिक मोठ्या संख्येने उपस्थित होते.