![Benefits of Donating Blood](http://media.assettype.com/pudhari%2Fimport%2Fwp-content%2Fuploads%2F2023%2F06%2FBenefits-of-Donating-Blood.jpg?w=480&auto=format%2Ccompress&fit=max)
पुढारी ऑनलाईन डेस्क : रक्तदान हे श्रेष्ठदान मानले जाते. रक्तदान करण्याचे अनेक फायदे आहेत. ठराविक कालावधीनंतर नियमित रक्तदान करणाऱ्यांना दीर्घकालिन शारीरिक आणि मानसिक फायदे मिळतात. सध्या हृदयविकाराचा धोका मोठ्या प्रमाणात वाढत आहे. मात्र काही संशोधनात असे दिसून आले आहे की, नियमित रक्तदानामुळे हृदयरोगाचा धोका कमी (Benefits of Donating Blood) होतो. हृदयरोग असणाऱ्या रूग्णांमध्ये नेमकी काय जोखीम असते आणि रक्तदाने केल्याने हा धोका कसा कमी होतो, जाणून घेऊया याविषयी….
न्यूयॉर्क 'प्रेस्बिटेरियन' या ऑनलाइन मासिकात दिलेल्या माहितीनुसार, हृदयविकार असणाऱ्या रूग्णांमध्ये उच्च रक्तदाब किंवा हायपरटेंन्शनची जोखीम सर्वाधिक असते. यामध्ये नियमित रक्तदान केल्यास रक्त प्रवाह आणि धमण्यांमधील अडथळा कमी होण्यास मदत होते. तसेच हृदय व रक्तवाहिन्यासंबंधी जोखीम कमी होऊन हृदयविकाराचा धोका टाळता येतो, असे डॉ. रॉबर्ट डीसिमोन यांनी मासिकात (Benefits of Donating Blood) दिलेल्या माहितीत सांगितले आहे.
शरीरात हिमोग्लोबिनचे प्रमाण खूप जास्त झाल्यास रक्तातील चिकटपणा वाढतो. यामुळे रक्तांच्या गुठळ्या निर्माण होऊन हृदयविकाराचा झटका येण्याची शक्यता वाढते. अशा परिस्थितीत नियमित रक्तदानामुळे रक्तातील चिकटपणा कमी होण्यास मदत होते, तसेच हृदयविकाराचा धोका देखील टळतो, असे न्यूयॉर्कमधील प्रेस्बिटेरियन/वेइल कॉर्नेल मेडिकल सेंटरचे संचालक डॉ. रॉबर्ट ए. डिसिमोन यांनी मासिकात यासंबंधी दिलेल्या लेखात नमूद केले आहे.