पुढारी ऑनलाईन: चळवळ… सत्याग्रहाची ती काठी, ज्याच्या जोरावर महात्मा गांधींनी संपूर्ण देशात स्वातंत्र्याचा जागर केला आणि इंग्रजांना देशातून पलायन करावे लागले. तेव्हापासून सत्याग्रहाचे हे हत्यार सर्वांनी अंगीकारले आणि यशही मिळाले. पण उत्तर प्रदेशातील आग्रा जिल्ह्यात सत्याग्रह करणाऱ्या एका महिलेचा ८३ दिवसांनी मृत्यू झाला. असे असतानाही आग्रा जिल्हा प्रशासन अजून जागे झालेले नाही. 83 दिवस आंदोलन करणाऱ्या महिलेची एकच मागणी होती की, आपल्या परिसरात नाले आणि रस्ते बांधण्यात यावे. पण झोपलेल्या अवस्थेत असणाऱ्या यंत्रणेने तसे करणे आवश्यकही मानले नाही. कडाक्याच्या थंडीत आंदोलन करणाऱ्या महिलेचा रविवारी मृत्यू झाला.
महिलेच्या मृत्यूनंतर लोक संतप्त झाले आहेत. माहिती मिळताच प्रशासकीय अधिकारी घटनास्थळी पोहोचले आणि त्यांनी आंदोलकांच्या मागण्यांवर कार्यवाहीचे आश्वासन दिले. यासोबतच अधिकाऱ्यांनी मृत व्यक्तीच्या कुटुंबीयांना आर्थिक मदत जाहीर केली आहे. मिळालेल्या माहितीनुसार, आग्राच्या धनौली अकोला ब्लॉकमधील सिरौली रस्त्याची अवस्था अत्यंत वाईट आहे. नागरिकांना ये-जा करताना अनेक अडचणींचा सामना करावा लागत आहे.
नाला आणि रस्ता बांधकाम मागणीसाठी 13 ऑक्टोबर पासून धनौलीमध्ये धरणे आंदोलन केले जात आहे. सुमारे 83 दिवस हे धरणे सुरू आहे. या धरणे आंदोलनात आजूबाजूच्या महिला व इतर लोकांचा सहभाग आहे. विकास नगर येथील रहिवासी असलेल्या राणी देवी, या दररोज आंदोलनस्थळी पोहोचायच्या. रविवारी सकाळी त्याचे डोळे उघडले नाही तेव्हा लोकांनी त्याला उठवण्याचा प्रयत्न केला. त्याचे शरीर थंड झाले होते. सामाजिक कार्यकर्त्या सावित्री चहर यांनी सांगितले की, त्यांनी तात्काळ एलआययू आणि प्रशासकीय अधिकाऱ्यांना माहिती दिली. डॉक्टरांचे पथक घटनास्थळी पोहोचले आणि राणीदेवीला मृत घोषित करण्यात आले. अधिकाऱ्यांनी मृत महिलेचे शवविच्छेदन केले. एसडीएम सदर लक्ष्मी सिंह, मंडळ अधिकारी महेश कुमार आदींच्या उपस्थितीत अंत्यसंस्कार करण्यात आले.
सामाजिक कार्यकर्त्या सावित्री चहर यांनी गेल्या चार वर्षांपासून अधिकाऱ्यांकडे चकरा मारत असल्याचे सांगितले. अनेकदा विरोध केला. जिल्हाधिकाऱ्यांना निवेदनही देण्यात आले, मात्र अधिकाऱ्यांनी दखल घेतली नाही. त्या म्हणाल्या की, सिरौली रोड ते चाइल्ड कम्युनिटी सेंटर या रस्त्याची अत्यंत दुरवस्था झाली आहे. लोकांना रस्त्यावरून ये-जा करताना खूप अडचणी येतात.
