"एक देश, एक संविधान आणि एक भाषा हे सूत्र लागू करा", संजय राऊतांचा गृहमंत्री शहांना आव्हान - पुढारी

"एक देश, एक संविधान आणि एक भाषा हे सूत्र लागू करा", संजय राऊतांचा गृहमंत्री शहांना आव्हान

पुढारी ऑनलाईन डेस्क : तामिळनाडूचे शिक्षण मंत्री पोनमुडी म्हणाले होते की, “हिंदी भाषा ही पाणीपुरीवाल्यांची भाषा आहे.” यावर नवा वाद उद्भवला असून त्यामध्ये आता शिवसेनेचे खासदार संजय राऊत यांनी हिंदी भाषेचा मुद्दा अधोरेखित करून गृहमंत्री अमित शहा यांनाच आव्हान दिलं आहे. राऊत म्हणाले की, “एक देश, एक संविधान आणि एक भाषा हे सूत्र लागू करण्याचं आव्हान आता अमित शाह यांनी स्वीकारलं पाहिजे.”

संजय राऊत मुंबईत पत्रकारांशी बोलत होते. ते म्हणाले की, “मी आणि माझा पक्ष हिंदी भाषेचा सन्मान करतो. संसदेत मी हिंदीतच बोलतो. कारण देशाने माझं म्हणणं ऐकावं. हिंदी ही देशाची भाषा आहे. त्यामुळे या भाषेचा सन्मान व्हावा. एक देश, एक संविधान आणि एक भाषा याचं आव्हान केंद्रीय गृहमंत्री अमित शाह यांनी स्वीकारलं पाहिजे”, असे आव्हान संजय राऊतांनी अमित शहांना केलं आहे. “हिंदी ही देशात सर्वाधिक बोलली जाणारी भाषा आहे. त्यामुळे हिंदीचा सर्वांनीच आदर केला पाहिजे”, असेही त्यांनी म्हटलं आहे.
शिवसेनेची आज जाहीर सभा आहे. त्यासंदर्भात बोलताना राऊतांनी विरोधी पक्षावर टीका केली. ते म्हणाले की, “महाराष्ट्रातील, देशातील वातावरणावर आलेलं मळभ, धुकं आणि गढूळपणा हे उद्धव ठाकरेंच्या आजच्या सभेनं दूर होईल. महाराष्ट्रातील आकाश निरभ्र होईल. या आकाशात भगव्या रंगाचं धनुष्य दिसेल. राज्य आणि शिवसेना पूर्णपणे छत्रपती शिवाजी महाराजांच्या विचारांवर चालत आहे. काही लोक राज्य बिघडवण्याचा प्रयत्न करत आहेत. काही अडथळे निर्माण करत आहेत. ही पोटदुखी आहे, जळजळ आहे त्यावर आजच्या सभेत योग्य उपचार केले जातील. बुस्टर डोस कुणाचा ते माहीत नाही. पण मास्टर ब्लास्टर डोस आमचाच असेल. आमची फटकेबाजी असते. प्युअर ब्लास्टर डोस असतो”, असेही संजय राऊत यांनी म्हटलेलं आहे.

Back to top button