India Oil Import Ban: जागतिक पातळीवर वाढलेल्या तणावाच्या पार्श्वभूमीवर भारतासाठी एक मोठी आर्थिक घडामोड समोर आली आहे. आता भारताला रशिया आणि इराणकडून तेल खरेदी करणे कठीण होणार आहे, कारण अमेरिकेने दिलेली तात्पुरती सूट संपली आहे.
अमेरिकेचे वित्तमंत्री स्कॉट बेसेंट यांनी स्पष्ट शब्दांत सांगितले की, रशिया आणि इराणच्या तेलासाठी दिलेली विशेष परवानगी (लायसन्स) आता वाढवली जाणार नाही. म्हणजेच, यापुढे या देशांकडून तेल खरेदी करण्यावर पुन्हा निर्बंध लागू होणार आहेत.
मिडल ईस्टमधील संघर्षामुळे जागतिक तेल पुरवठा विस्कळीत झाला होता. तेव्हा अमेरिकेने काही देशांना ज्यात भारताचाही समावेश होता तात्पुरती 30 दिवसांची सूट दिली होती. या सूटमुळे आधीच जहाजांवर लोड केलेलं तेल खरेदी करण्याची परवानगी मिळाली होती.
रशियन तेलासाठी दिलेली सूट 11 एप्रिललाच संपली आहे. तर इराणच्या तेलासाठीची सूट 19 एप्रिलला संपणार आहे. अमेरिकेच्या निर्णयामुळे आता नवीन व्यवहारांवर मर्यादा येणार आहेत.
भारत हा जगातील मोठ्या तेल आयातदार देशांपैकी एक आहे. रशिया आणि इराणकडून स्वस्त दरात तेल मिळत असल्यामुळे भारताला फायदा होत होता.
आता ही सोय नसल्याने:
तेलाच्या किंमती वाढण्याची शक्यता आहे
आयात खर्च वाढू शकतो
महागाईवरही परिणाम होऊ शकतो
या निर्णयाचा परिणाम केवळ भारतावर नाही, तर संपूर्ण जगावर होणार आहे. तेलाचा पुरवठा कमी झाला तर जागतिक बाजारात किंमती पुन्हा वाढू शकतात.
थोडक्यात अमेरिकेच्या निर्णयामुळे भारतासाठी तेल खरेदीचं समीकरण बदलणार आहे.
स्वस्त तेलाचा पर्याय कमी होणार असून, आर्थिक दबाव वाढण्याची शक्यता आहे.
