US-Israel-Iran War:
वॉशिंग्टन: अमेरिकेचे राष्ट्राध्यक्ष डोनाल्ड ट्रम्प यांनी इराणसोबतचा करार पूर्ण झाल्याचे जाहीर केले. सोशल मीडियावरील एका पोस्टमध्ये त्यांनी म्हटले की, "इस्लामिक रिपब्लिक ऑफ इराणसोबतचा करार आता पूर्ण झाला आहे." होर्मुझची सामुद्रधुनी त्वरित खुली केली जाईल आणि अमेरिकेकडून लादलेली नौदल नाकेबंदी उठवली जाईल, असे ट्रम्प यांनी सांगितले.
ट्रम्प यांनी शेअर केलेल्या पोस्टमध्ये "सर्वांचे अभिनंदन!" असे लिहिले आहे. "मी याद्वारे 'स्ट्रेट ऑफ होर्मुझ' विनाशुल्क खुला करण्यास पूर्ण मंजुरी देत आहे. त्याचबरोबर अमेरिकेची नौदल नाकेबंदी त्वरित उठवण्यासही अधिकृत मान्यता देत आहे. जगातील जहाजांनो, तुमची इंजिने सुरू करा. तेलाचा प्रवाह सुरू होऊ द्या" असे ट्रम्प यांनी म्हटले आहे. व्हाईट हाऊसमध्ये आपल्या ८० व्या वाढदिवसानिमित्त आयोजित 'यूएफसी' कार्यक्रमाच्या काही तास आधीच ट्रम्प यांनी ही घोषणा केली.
दुसरीकडे, इराणच्या सरकारी माध्यमांनी दिलेल्या वृत्तानुसार, जोपर्यंत काही प्रमुख मागण्या पूर्ण होत नाहीत तोपर्यंत अंतिम वाटाघाटींमध्ये सहभागी होणार नाही, अशी इराणची भूमीका आहे. या मागण्यांमध्ये इराणचा अर्धा गोठवलेला निधी मुक्त करणे, तेल निर्यातीवरील निर्बंध रद्द करणे आणि नौदलाची नाकेबंदी उठवणे यांचा समावेश आहे.
इराणचे उप-परराष्ट्र मंत्री काझम घरीबाबादी यांनी सावध पवित्रा घेत आणि ट्रम्प यांच्या विधानांशी तंतोतंत सहमत न होता असे सांगितले की, एका सर्वसमावेशक कराराबाबतची चर्चा पुढील ६० दिवस सुरू राहील आणि निर्बंध उठवणे हा या वाटाघाटींचा मुख्य केंद्रबिंदू असेल. त्यांनी सांगितले की अमेरिकेसोबतच्या नव्याने जाहीर झालेल्या समझोत्यांतर्गत इराणच्या जबाबदाऱ्यांची अंमलबजावणी शुक्रवारपासून सुरू होईल.
घरीबाबादी म्हणाले की, इराण चर्चेच्या पुढील टप्प्यावर तेव्हाच जाईल जेव्हा त्यांची गोठवलेली मालमत्ता मुक्त केली जाईल, अमेरिकेच्या नेतृत्वाखालील नाकेबंदी उठवली जाईल आणि संघर्ष अधिकृतपणे संपल्याचे जाहीर केले जाईल. त्यांनी असेही सांगितले की, इराणने सामंजस्य कराराच्या मसुद्यामध्ये सर्व महत्त्वाच्या मुद्द्यांचा समावेश केला आहे आणि शुक्रवारी नियोजित अधिकृत समारंभानंतर या कराराचा मजकूर प्रसिद्ध केला जाईल.
