पुढारी ऑनलाईन डेस्क : रशियाच्या क्षेपणास्त्र हल्ल्यात युक्रेनची राजधानी कीव्हमधील भारतीय औषध कंपनी 'कुसुम' चे गोदाम उद्ध्वस्त झाले, असा दावा भारतातील युक्रेन दूतावासाने शनिवारी केला. भारताशी विशेष मैत्री असताना रशियाने मुद्दाम भारतीय व्यवसायांना लक्ष्य केल्याचा आरोप ही युक्रेनने केला आहे.
भारत आणि रशिया सरकारकडून अद्याप कोणतीही अधिकृत प्रतिक्रिया देण्यात आलेली नाही. रशियन क्षेपणास्त्राने युक्रेनमधील भारतीय औषध कंपनी 'कुसुम'च्या गोदामावर हल्ला केला. भारताशी मैत्री असल्याचे म्हणत रशिया भारतीय व्यावसायिकांना मुद्दाम लक्ष्य करत आहे. लहान मुलं आणि ज्येष्ठ नागरिकांसाठी असलेली औषधं नष्ट झाली आहेत, असं ट्वीट युक्रेन दूतावासाने केल आहे.
याच हल्ल्यावर यूकेचे युक्रेनमधील राजदूत मार्टिन हॅरिस यांनीही प्रतिक्रिया दिली असून, त्यांनी सांगितलं की कीव्हमधील एका मोठ्या औषध गोदामावर रशियन ड्रोनने हल्ला केला. मात्र, त्यांनी त्या गोदामाचं नाव सांगितलेले नाही. "आज सकाळी, रशियन ड्रोनने कीव्हमधील एका मोठ्या औषध गोदामावर हल्ला केला. औषधांचा संपूर्ण साठा जळून खाक झाला. रशियाचा नागरिकांवर दहशतीचा डाव सुरूच आहे," असं हॅरिस यांनी ट्वीटमध्ये म्हटलं आहे. तसेच, त्यांनी एक फोटोही शेअर केला आहे, ज्यात धुराचे लोट आणि एक अग्निशमन वाहन दिसत आहे.
