Russia Ukraine war latest attack : रशिया आणि युक्रेन यांच्यातील गेल्या पाच वर्षांपासून सुरू असणारा रक्ततरंजित संघर्ष कायम आहे. रशियन सैन्याने अचूक मारा करणारी शस्त्रे आणि ड्रोनचा वापर करून कीव्ह आणि युक्रेनच्या इतर अनेक भागांमधील लष्करी-औद्योगिक सुविधांवर "मोठा हल्ला" केला, अशी माहिती आज (दि. ७ ऑक्टोबर) रशियाच्या संरक्षण मंत्रालयाने दिली. तर "आज, पुतिन यांना वाढदिवसाची 'भेट' म्हणून, रशियन सैन्याने चेर्निहिव्ह प्रदेशातील प्रिलुकी येथील एक निवासी इमारत उद्ध्वस्त केली. या हल्ल्यांमध्ये किमान ११ जण ठार झाले आहेत", अशी माहिती युक्रेनचे राष्ट्राध्यक्ष झेलेन्स्की यांनी सोशल मीडिया प्लॅटफॉर्मच्या माध्यमातून दिली आहे.
रशियन संरक्षण मंत्रालयाने दिलेल्या माहितीनुसार, या हल्ल्यांमध्ये जमीन, समुद्र आणि हवेतून डागली जाणारी शस्त्रे तसेच ड्रोनचा वापर करण्यात आला. कीव्हमधील 'फायर पॉइंट' या ठिकाणालाही लक्ष्य करण्यात आले, जिथे 'फ्लेमिंगो' क्रूझ क्षेपणास्त्रे तसेच मध्य आणि लांब पल्ल्याचे ड्रोन तयार केले जातात आणि साठवले जातात, असा दावा रशियाने केला आहे. रशियन संरक्षण मंत्रालयाने पुढे सांगितले की कीव्ह, चेर्निहिव्ह, किरोव्होह्राद, डनिप्रोपेत्रोव्हस्क, पोलतावा आणि खारकीव्ह भागांतील लष्करी-औद्योगिक तळांनाही या हल्ल्यात लक्ष्य करण्यात आल्याचे वृत्त रॉयटर्सने दिले आहे.
युक्रेनचे अध्यक्ष व्होलोडिमिर झेलेन्स्की यांनी दिलेल्या माहितीनुसार, देशाच्या ऊर्जा पायाभूत सुविधांना लक्ष्य करून सुमारे ७० क्षेपणास्त्रे आणि अनेक ड्रोन सोडण्यात आले, असे रॉयटर्सने नमूद केले आहे. युक्रेनभरात झालेल्या या हल्ल्यांमध्ये किमान ११ जणांचा मृत्यू झाला आहे. रशियाला मोठे नुकसान पोहोचवायचे होते आणि या हल्ल्याद्वारे संदेश द्यायचा होता, असा आरोप करत झेलेन्स्की यांनी ऊर्जा यंत्रणेला मुख्य लक्ष्य करण्यात आल्याचे सांगितले.
सोशल मीडिया प्लॅटफॉर्म टेलिग्रामवरील पोस्टमध्ये युक्रेनचे राष्ट्राध्यक्ष झेलेन्स्की यांनी म्हटलं आहे की, "आज, पुतिन यांना वाढदिवसाची 'भेट' म्हणून, रशियन सैन्याने चेर्निहिव्ह प्रदेशातील प्रिलुकी येथील एक निवासी इमारत उद्ध्वस्त केली. ही पाच मजली अपार्टमेंट इमारत होती. दुर्दैवाने, आतापर्यंत पाच जण ठार आणि पाच मुलांसह २६ जण जखमी झाल्याचे वृत्त आहे. ढिगाऱ्याखाली अजूनही काही लोक असू शकतात. घटनास्थळी बचाव पथके अविरतपणे काम करत आहेत. प्रत्येक व्यक्तीला शोधण्यासाठी सर्वतोपरी प्रयत्न करत आहेत. रशियन क्षेपणास्त्र हल्ल्यांमुळे डनिप्रोमधील पाच अपार्टमेंट इमारती आणि क्रेमेन्चुकमधील चार उंच इमारतींचेही नुकसान झाले. दुर्दैवाने, दोन जण ठार आणि आठ जण जखमी झाले. झापोरिझियामधील एका उंच इमारतीचे ड्रोनद्वारे नुकसान झाले. कीव्हमध्ये रशियनांनी दोन जणांना ठार केले. ओलेक्झांड्रियामध्ये आणखी दोन जण ठार झाले… ठार झालेल्यांच्या सर्व कुटुंबीयांना आणि प्रियजनांना माझ्या संवेदना. एकूणच, काल रात्री कीव्ह आणि १२ प्रदेशांमधील पायाभूत सुविधांवर हल्ला झाला.
आमच्या ऊर्जा पायाभूत सुविधा हे प्रमुख लक्ष्यांपैकी एक होते. रशियनांना वेदनादायक आणि प्रात्यक्षिक हल्ला करायचा होता. हा सर्वात घृणास्पद हल्ल्यांपैकी एक होता: एकूण ७० क्षेपणास्त्रे, त्यापैकी अनेक बॅलिस्टिक, तसेच 'शहेद' क्षेपणास्त्रे होती. दुर्दैवाने, त्यापैकी फक्त काहीच पाडण्यात आली. रशियन बॅलिस्टिक क्षेपणास्त्रे हे सर्वात मोठे आव्हान आहे. आणि सध्या आमच्यासाठी हवाई संरक्षण प्रणाली ही एक अत्यावश्यक गरज आहे. म्हणूनच आम्ही दररोज पॅट्रियट प्रणालीसाठी अशा क्षेपणास्त्रांचा शोध घेत आहोत, जी युक्रेनच्या आकाशात लोकांच्या जीविताचे रक्षण करू शकतील आणि करायलाच हवीत. आम्हाला मदत करणाऱ्या प्रत्येकाचे आभार," असेही झेलेन्स्की यांनी म्हटलं आहे.
