Houthi attacks Saudi Arabia
इस्लामाबाद : सौदी अरेबियावर हुथी बंडखोरांनी केलेल्या हल्ल्यांच्या पार्श्वभूमीवर, मक्का करारांतर्गत पाकिस्तानकडून लष्करी प्रत्युत्तर देण्याबाबत कोणतीही चर्चा झाली नसल्याचे पाकिस्तानने गुरुवारी स्पष्ट केले आहे. मात्र “योग्य वेळ आल्यावर मक्का करारानुसार कारवाई करू,” असा इशारा पाकिस्तानच्या परराष्ट्र मंत्रालयाने दिला आहे.
पाकिस्तानच्या परराष्ट्र मंत्रालयाचे प्रवक्ते सज्जाद हैदर खान यांनी गुरुवारी पत्रकार परिषदेत भूमिका स्पष्ट केली. तुर्की आणि सौदी अरेबियासोबत पाकिस्तानने गेल्या महिन्यात केलेल्या संयुक्त संरक्षण करारानुसार आपल्या जबाबदाऱ्या कशा पार पाडणार, असा प्रश्न त्यांना विचारण्यात आला होता. “सध्या अशा कोणत्याही लष्करी कारवाईबाबत चर्चा सुरू नाही. मात्र, वेळ आल्यावर आम्ही करारातील तरतुदींनुसार कारवाई करू,” असे खान यांनी सांगितले.
पाकिस्तान, तुर्की आणि सौदी अरेबिया यांच्यात गेल्या महिन्यात झालेल्या संयुक्त संरक्षण करारात महत्त्वाची तरतूद करण्यात आली आहे. या करारानुसार, तिन्ही देशांपैकी कोणत्याही एका देशावर सशस्त्र हल्ला झाल्यास तो तिन्ही देशांवरील हल्ला मानला जाईल.
इराणचा पाठिंबा असलेल्या हुथी बंडखोरांनी या आठवड्यात सौदी अरेबियाची शहरे आणि ऊर्जा क्षेत्रातील पायाभूत सुविधांवर हल्ले केल्यानंतर पाकिस्तानच्या भूमिकेकडे लक्ष लागले आहे. या हल्ल्यांमुळे मध्यपूर्वेतील संघर्षाला आणखी एक युद्धभूमी मिळाल्याचे चित्र निर्माण झाले आहे.
हुथींनी सौदी अरेबियावरील हल्ले तीव्र केल्यानंतर पाकिस्तानने इराणला आपल्या येमेनमधील हुथी मित्रपक्षांवर आवर घालण्याचा इशारा दिल्याचे वृत्त आहे. पाकिस्तानने या हल्ल्यांचा निषेध केला असला, तरी संरक्षण करारानुसार पाकिस्तान नेमकी कोणती पावले उचलणार, याबाबत अद्याप कोणतीही स्पष्ट माहिती देण्यात आलेली नाही.
दरम्यान, अमेरिका आणि इराण यांच्यातील संघर्षात पाकिस्तान मध्यस्थीची भूमिकाही बजावत आहे. त्यामुळे मध्यपूर्वेतील वाढत्या तणावाच्या पार्श्वभूमीवर पाकिस्तानचा सावध पवित्रा महत्त्वाचा मानला जात आहे. दरम्यान, अमेरिकेकडून प्रादेशिक अशांतता आणि त्यामुळे जागतिक ऊर्जा पुरवठ्यात झालेला अडथळा दूर करण्याचे प्रयत्न सुरू असतानाच, मक्का आघाडीचा विस्तार करण्याचा सध्या कोणताही विचार नाही, असेही प्रवक्ते खान यांनी स्पष्ट केले.
