Gujarat Maharashtra Day 2026: न्यूयॉर्क येथे भारतीय वंशाच्या समुदायाने गुजरात-महाराष्ट्र दिन २०२६ मोठ्या उत्साहात साजरा केला. उत्तर अमेरिकेतील गुजराती संघटना (GANA), Consulate General of India, New York आणि Federation of Indian Associations (FIA) यांच्या संयुक्त विद्यमाने १ मे रोजी हा भव्य सोहळा पार पडला.
या कार्यक्रमात भारतीय वंशीय नागरिक, मान्यवर, राजकीय नेते आणि कलाकार मोठ्या संख्येने सहभागी झाले होते. सांस्कृतिक एकात्मता आणि परंपरेचा उत्सव सकारात्मक वातावरणात साजरा झाल्याने हा सोहळा खास ठरला.
कार्यक्रमाची सुरुवात गणेश स्तुतीने झाली. त्यानंतर विविध सांस्कृतिक सादरीकरणांनी संपूर्ण संध्याकाळ रंगतदार केली. ग्रॅमी पुरस्कार विजेती गायिका फालू शाह यांनी सादर केलेल्या सुरेल कार्यक्रमाने उपस्थितांची मनं जिंकली. तसेच हार्दिक चौहान यांनी गुजराती लोकसंगीताचे सादरीकरण करुन कार्यक्रमात रंग भरला.
युवकांच्या ‘डान्सिंग स्टार्स’ या गटाने गणपती परंपरा, गरबा आणि दांडिया यांचा फ्युजन नृत्य सादर करत प्रेक्षकांची मन जिंकली. हा कार्यक्रमाचा विशेष आकर्षण ठरला.
कार्यक्रमातील आणखी एक खास भाग म्हणजे पारंपरिक शाकाहारी जेवण. समाजातील महिलांनी आणि पुरुषांनी स्वतः तयार केलेल्या पदार्थांनी भारतीय चवीची आठवण करून दिली. या उपक्रमातून परंपरा जपण्याचा आणि पुढील पिढीपर्यंत पोहोचवण्याचा प्रयत्न दिसून आला.
या कार्यक्रमात भारताचे अमेरिकेतील राजदूत विनय क्वात्रा यांनी गुजरात आणि महाराष्ट्र या राज्यांचे महत्त्व अधोरेखित केले. त्यांनी सांगितले की, या दोन्ही राज्यांचा भारताच्या GDPमध्ये जवळपास २५ टक्के वाटा आहे आणि भारत-अमेरिका संबंधांमध्येही त्यांचा मोठा वाटा आहे.
माजी केंद्रीय मंत्री सुरेश प्रभू यांनी भारताच्या संघराज्य व्यवस्थेची तुलना संयुक्त कुटुंबाशी करत, गुजरात आणि महाराष्ट्र या राज्यांची देशाच्या प्रगतीमधील भूमिका महत्त्वाची असल्याचे सांगितले.
या सोहळ्यात अमेरिकेतील भारतीय वंशीय नेत्यांचाही सन्मान करण्यात आला. न्यू जर्सीमधील वेस्ट विंडसरचे महापौर हेमंत मराठे आणि पार्सिपनी-ट्रॉय हिल्सचे महापौर पुलकित देसाई यांचा गौरव करण्यात आला. तसेच अभिनेत्री अर्चना जोगळेकर आणि पूजा झवेरी यांची विशेष उपस्थिती होती. GANAचे अध्यक्ष सृजल पारीख यांनी गेल्या दहा वर्षांतील सामाजिक उपक्रमांचा आढावा घेतला.
कार्यक्रमाच्या शेवटी समाजसेवक सौरिन दवे आणि केनी देसाई यांचा सन्मान करण्यात आला. या भव्य सोहळ्याने केवळ गुजरात-महाराष्ट्र दिन साजरा केला नाही, तर भारतीय संस्कृती, एकता आणि परदेशातील भारतीयांच्या मजबूत नात्याचाही उत्सव साजरा केला. एकूणच, हा कार्यक्रम भारतीय परंपरा आणि आधुनिकतेचा सुंदर संगम ठरला.
