France recognises Palestine UNGA Emmanuel Macron
पॅरिस : फ्रान्सने सप्टेंबर 2025 मध्ये संयुक्त राष्ट्र महासभेत (UNGA) पॅलेस्टाईनला स्वतंत्र राष्ट्र म्हणून औपचारिक मान्यता देण्याचा ऐतिहासिक निर्णय घेतला आहे. राष्ट्राध्यक्ष इमॅन्युएल मॅक्रॉन यांनी गुरुवारी संध्याकाळी 'X' (पूर्वीचे ट्विटर) या सोशल मीडियावर ही घोषणा केली.
मॅक्रॉन यांनी पॅलेस्टाईन अथॉरिटीचे अध्यक्ष महमूद अब्बास यांना पत्र पाठवून आपल्या निर्णयाची माहिती दिली. या पत्रात त्यांनी म्हटले की, “मध्यपूर्वेत न्याय आणि शाश्वत शांततेच्या ऐतिहासिक वचनबद्धतेप्रमाणे, मी फ्रान्सकडून पॅलेस्टाईनला मान्यता देण्याचा निर्णय घेतला आहे. मी ही औपचारिक घोषणा संयुक्त राष्ट्र महासभेत पुढील सप्टेंबरमध्ये करणार आहे.”
मॅक्रॉन यांनी हेही स्पष्ट केले की, गाझामधील युद्ध थांबवणे आणि सामान्य नागरिकांचे प्राण वाचवणे हे आत्ता सर्वात महत्त्वाचे आहे. “आपल्याला आता पॅलेस्टाईन राज्याची उभारणी करावी लागेल, त्याची व्यवहार्यता सुनिश्चित करावी लागेल आणि ते इस्रायलला पूर्ण मान्यता देईल व नाश न करता शांतीपूर्ण सहअस्तित्व स्वीकारेल, याची काळजी घ्यावी लागेल,” असेही त्यांनी लिहिले.
इस्रायली पंतप्रधान बेंजामिन नेतन्याहू यांनी फ्रान्सच्या निर्णयावर तीव्र प्रतिक्रिया दिली. त्यांनी म्हटले, “हा निर्णय दहशतवादाला बक्षीस देतो आणि इस्रायलच्या विनाशासाठी आणखी एक इराणी पिट्ठू निर्माण करू शकतो.”
अमेरिकेचे परराष्ट्रमंत्री मार्को रुबिओ यांनीही तीव्र नाराजी व्यक्त करत हा निर्णय “बेजबाबदार” असल्याचे म्हटले. त्यांनी असेही सांगितले की, “हा निर्णय 7 ऑक्टोबर रोजी झालेल्या हमासच्या हल्ल्याच्या बळींसाठी अपमानास्पद आहे.”
पॅलेस्टाईन अथॉरिटीचे उपाध्यक्ष हुसेन अल-शेख यांनी मॅक्रॉन यांच्या निर्णयाचे स्वागत करत लिहिले की, “फ्रान्सने आंतरराष्ट्रीय कायद्यानुसार आमच्या स्वातंत्र्य व आत्मनिर्णयाच्या अधिकाराला पाठिंबा दिला आहे.”
हमासनेही मॅक्रॉन यांच्या घोषणेचे समर्थन करत ती “दबलेल्या पॅलेस्टाईन जनतेसाठी न्याय मिळवण्याच्या दिशेने सकारात्मक पाऊल” असल्याचे म्हटले.
ब्रिटनचे पंतप्रधान केर स्टार्मर यांनी फ्रान्स व जर्मनीच्या नेत्यांसोबत चर्चा होणार असल्याचे सांगितले. त्यांनी म्हटले की, “शांततेचा करार मान्य झाल्यास, पॅलेस्टाईन राज्याच्या मान्यतेकडे वाटचाल होईल.”
स्पेन, आयर्लंड, नॉर्वे आणि स्लोव्हेनिया या देशांनी 2024 मध्येच पॅलेस्टाईनला मान्यता दिली होती.
सौदी अरेबियाने मॅक्रॉन यांच्या निर्णयाचे स्वागत करून त्याला “ऐतिहासिक” म्हटले आहे.
जुलै अखेरीस न्यू यॉर्कमध्ये फ्रान्स-सौदी संयुक्तरित्या आयोजित केलेली परिषद मंत्रीस्तरावर होणार आहे. यानंतर सप्टेंबरमध्ये संयुक्त राष्ट्र महासभेच्या दरम्यान दुसरी उच्चस्तरीय बैठक होणार आहे. फ्रान्सने ही घोषणा याआधी करून जागतिक चर्चेत स्पष्ट भूमिका घेतली आहे.
गाझामधील स्थिती गंभीर
दरम्यान, युएनच्या पॅलेस्टाईनविषयक प्रमुख संस्थेचे प्रमुख म्हणाले की, गाझामधील युएन कर्मचारी भुकेने बेशुद्ध पडत आहेत. तिथे उपासमारीमुळे मृत्यू वाढत आहेत आणि संघर्ष थांबण्याची आशा क्षीण होत आहे.
