तेहरान : ऑक्टोबर 2024 मध्ये पाच वर्षांनंतर प्रथमच सार्वजनिकरीत्या समोर येताना इराणचे सर्वोच्च नेते आयतुल्ला अली खामेनी यांनी कठोर संदेश दिला. इस्रायल ‘जास्त काळ टिकणार नाही,’ असे त्यांनी तेहरानमधील मशिदीत हजारो समर्थकांना शुक्रवारी दिलेल्या भाषणात सांगितले. ‘आपण अढळ श्रद्धा बळकट करत शत्रूविरुद्ध उभे राहिले पाहिजे,’ असे तेव्हा 84 वर्षीय खामेनी म्हणाले.
सतरा महिन्यांनंतर अनेक दशकांच्या कटू संघर्षानंतर त्यांना शेवटच्या निर्णायक संघर्षाला सामोरे जावे लागले. इस्रायलचे पंतप्रधान बेंजामीन नेतान्याहू यांनी शनिवारी खामेनी ‘आता आपल्यात नाहीत’ असे संकेत दिले; मात्र मृत्यूची स्पष्ट पुष्टी केली नाही. काही तासांनी डोनाल्ड ट्रम्प यांनीही खामेनी मारले गेल्याचा दावा केला आणि त्यानंतर इराणी सरकारी माध्यमांनी त्याची पुष्टी केली. शनिवारी झालेल्या हल्ल्यांच्या सुरुवातीपासूनच सर्वोच्च नेते लक्ष्यावर असल्याचे स्पष्ट होते. उपग्रह चित्रांमध्ये त्यांच्या सुरक्षित संकुलाचे
मोठे नुकसान झाल्याचे दिसले. इस्रायल आणि अमेरिकेने खामेनी यांना संपवून इस्लामिक रिपब्लिक ऑफ इराणचा सध्याच्या स्वरूपातील अंत घडवण्याची इच्छा कधीही लपवली नव्हती. ऑक्टोबर 2024 मध्येच खामेनी अडचणीत दिसत होते. त्याआधी इस्रायलने बेरूतमध्ये हिझ्बुल्लाचे महासचिव हसन नसरल्ला यांची हत्या केली होती.
इराणने आपल्या हल्ल्यात ठार झालेल्या सर्वोच्च नेते अयातुल्लाह खामेनी यांच्या स्मरणार्थ रविवारी 40 दिवसांच्या दुखवट्याची सुरुवात केली आणि अमेरिकेचे राष्ट्राध्यक्ष डोनाल्ड ट्रम्प यांनी अभूतपूर्व शक्ती वापराची धमकी दिली असतानाही इराणने आखाती प्रदेशातील अमेरिकन तळांवर नव्या हल्ल्यांची घोषणा केली. तेहरानमध्ये मोठ्या प्रमाणावर लोक जमा झाले असताना स्फोटांचे आवाज घुमत होते आणि इस्रायली लष्कराने शहराच्या मध्यभागी पुन्हा लक्ष्यांवर हल्ले करत असल्याची घोषणा केली. उत्तरी तेहरानमध्ये स्फोट ऐकू आले आणि एका इमारतीतून धूर निघताना दिसला, असे एएफपीच्या पत्रकाराने सांगितले. लक्ष्य नेमके काय होते, हे तत्काळ स्पष्ट झाले नाही.
