Eileen Wang illegal Chinese agent: अमेरिकेतील दक्षिण कॅलिफोर्नियामधील अर्केडिया (Arcadia) शहराच्या महापौर आयलिन वांग (Eileen Wang) यांनी चीन सरकारसाठी 'बेकायदेशीर एजंट' म्हणून काम केल्याची कबुली दिली आहे. या धक्कादायक प्रकणानंतर त्यांनी आपल्या महापौरपदाचा राजीनामा दिला असून, त्यांना १० वर्षांपर्यंतच्या तुरुंगवासाची शिक्षा होण्याची शक्यता आहे.
५८ वर्षीय आयलिन वांग यांच्यावर एप्रिल महिन्यात परदेशी सरकारचे बेकायदेशीर एजंट म्हणून काम केल्याचा आरोप ठेवण्यात आला होता. अधिकृत तपासात असे समोर आले की, वांग यांनी अमेरिकन सरकारला कोणतीही पूर्वसूचना न देता चिनी अधिकाऱ्यांच्या सांगण्यावरून बीजिंगच्या बाजूने लेख शेअर करणे आणि चिनी अजेंडा राबवण्याचे काम केले आहे.
न्यूज वेबसाइटचा वापर: वांग आणि त्यांचे सहकारी 'माईक' सन यांनी मिळून 'U.S. News Center' नावाची वेबसाइट चालवली. या साइटचा उद्देश चिनी अमेरिकन समुदायापर्यंत पोहोचणे आणि चीन सरकारच्या फायद्याचा मजकूर प्रसिद्ध करणे हा होता.
मानवाधिकारांबाबत चुकीची माहिती: जून २०२१ मध्ये, वांग यांनी त्यांच्या वेबसाइटवर चिनी वाणिज्य दूतावासाचे एक पत्र प्रसिद्ध केले होते. यामध्ये चीनमधील शिंजियांग प्रांतातील उइगर मुस्लिमांवरील अत्याचार आणि छळवणुकीचे वृत्त फेटाळून लावले होते. विशेष म्हणजे, अमेरिकेसह अनेक देशांनी या घटनेला 'नरसंहार' (Genocide) घोषित केले आहे.
आयलिन वांग नोव्हेंबर २०२२ मध्ये पाच सदस्यीय नगरपरिषदेवर निवडून आल्या होत्या. त्यांचे सहकारी माईक सन हे त्यांच्या निवडणूक मोहिमेचे खजिनदार होते. माईक सन यांनीही यापूर्वीच अशाच आरोपाखाली आपला गुन्हा मान्य केला असून ते चार वर्षांची शिक्षा भोगत आहेत. वांग यांच्या वकिलांनी सांगितले की, "चुकीच्या व्यक्तीवर विश्वास ठेवल्यामुळे आणि प्रेमात पडल्यामुळे त्यांच्याकडून या चुका झाल्या".
अर्केडिया शहराचे व्यवस्थापक डॉमिनिक लाझारेटो यांनी स्पष्ट केले की, हा तपास आयलिन वांग यांच्या वैयक्तिक वर्तणुकीशी संबंधित आहे. यामध्ये शहराचा कोणताही निधी किंवा कर्मचारी सामील नव्हते. तसेच, त्यांनी महापौर म्हणून शपथ घेण्यापूर्वीच हे बेकायदेशीर काम थांबवले होते.
अर्केडिया शहर हे लॉस एंजेलिसपासून १३ मैलांवर असून येथे चिनी नागरिकांची मोठी लोकसंख्या आहे. या प्रकरणामुळे अमेरिकेतील स्थानिक राजकारणात खळबळ उडाली आहे.
