Russia-Ukraine War Live : खार्किवमध्‍ये हॉस्‍पिटलवर हल्‍ला, रशियाने कीव्‍हमध्‍ये कमांडो पथक उतरवले
मास्‍को/ कीव्‍ह : पुढारी ऑनलाईन
रशिया-युक्रेन युद्ध आता निर्णायक वळणावर येवून ठेपले आहे. ( Russia-Ukraine War Live ) युक्रेनची राजधानी
कीव्‍हवर कब्‍जा मिळविण्‍यासाठी रशियन कमांडो पथक उतरले आहे. शहराबाहेर ६४ किलोमीटर अंतर रशियन लष्‍कराने कब्‍जा केला आहे. अशातच युक्रेनच्या दक्षिण-पूर्व भागातही रशियन सैन्‍याने आगेकूच सुरु असल्‍याचे वृत्त आहे. आज सकाळी खार्किवमध्‍ये रशियन सैन्‍याने हवाई मार्गाने घुसखोरी केली. यानंतर एका हॉस्‍पिटलमध्‍ये हल्‍ला केल्‍याचे युक्रेनच्या लष्‍कराने म्‍हटलं आहे.
खार्किवमध्‍ये रशियन सैन्‍यांची हवाई मार्गाने घुसखोरी
मंगळवारी रात्री खार्किव येथील युक्रेनच्या शस्‍त्रासाठा डेपो रशियाने क्षेपणास्‍त्र हल्‍ल्‍याने उद्‍ध्‍वस्‍त केला. युद्धाच्‍या सातव्‍या दिवशी युक्रेनमधील महत्‍वाच्‍या शहरांवरील हल्‍ले आणखी तीव्र करण्‍यात आले आहेत. खार्किवमध्‍ये रयिशन सैनिकांनी हवाई मार्गाने प्रवेश केला. येथील एका हॉस्‍पिटलवरही त्‍यांन हल्‍ला केल्‍याचे युक्रेनच्या लष्‍कराने म्‍हटलं आहे. दरम्‍यान, युक्रेनच्या आपत्तकालीन सेवेने नागरिकांसाठी व्‍हॉटस ॲपच्‍या माध्‍यमातून हेल्‍पलाईन सुरु केली आहे. यामुळे हल्‍ला झालेल्या ठिकाणी नागरिकांना सुरक्षित स्‍थळी हलविण्‍यासाठी मदत होणार आहे.
१०० देशांच्‍या राजदुतांचा रशियाच्‍या परराष्‍ट्र मंत्र्यांचा बहिष्‍कार
संयुक्‍त राष्‍ट्र मानवाधिकार परिषदेमध्‍ये १०० देशांच्‍या राजदुतांचा रशियाच्‍या परराष्‍ट्र मंत्र्यांचा बहिष्‍कार टाकला. रशियाचे परराष्‍ट्र मंत्री सर्गेई लावरोव हे मानवाधिकार परिषदेमध्‍ये बोलण्‍यासाठी उभारल्‍यानंतर १०० राजदुतांनी सभात्‍याग केला.
आज पोलंडमध्‍ये रशिया-युक्रेनमध्ये दुसर्‍या टप्‍प्‍यातील चर्चा
पोलंडमध्‍ये आज रशिया-युक्रेनमध्ये दुसर्‍या टप्‍प्‍यातील चर्चा होणार आहे. ही चर्चा आज किती वाजता होईल, हे अद्‍याप स्‍पष्‍ट करण्‍यात आलेले नाही. चर्चेचा दुसरा टप्‍पा सुरु होण्‍यापूर्वी रशियाने युक्रेनमधील कीव्‍ह, खार्किव आणि चेर्निहायव शहरांतील नागरी वस्‍त्‍यांवर बॉम्‍बहल्‍ले आणखी तीव्र केले आहेत.
जागतिक बॅकेकडून युक्रेनला ३ अब्‍ज डॉलरची मदत
रशियाने केलेल्‍या हल्‍ल्‍यांमध्‍ये युक्रेनमधील शहरांचे अतोनात नुकसान झाले आहे. आता जागतिक बँक युक्रेनच्या मदतीसाठी सरसावली आहे. जागतिक बॅकेकडून युक्रेनला ३ अब्‍ज डॉलरची मदत दिली जाणार आहे. यातील ३५ कोटी डॉलर पुढील आठवड्यात दिले जाणार असल्‍याची माहिती जागतिक बँकेच्‍या सूत्रांनी दिली. संयुक्‍त राष्‍ट्राने जाहीर केलेल्‍या माहितीनुसार, आतापर्यंत युक्रेनमधील ६ लाख ६० हजार नागरिकांनी देश सोडला आहे.
हेही वाचलं का?
- russia ukraine war : युक्रेनच्या झेलेन्स्कींसमोर झुकला ‘युरोपियन युनियन’!
- Ukraine Russia war : आणि युक्रेन रशियाविरोधात एकटा पडला !
- ‘युक्रेनमध्ये मृत्यू झालेल्या कर्नाटकच्या नवीनचे पार्थिव तीन दिवसांत आणणार’