पुढारी ऑनलाईन डेस्क : ज्येष्ठ लेखक, विचारवंत आणि वक्ते हरी रामचंद्र नरके यांचे आज निधन झाले. मुंबईतील एशियन हार्ट हॉस्पिटलमध्ये त्यांनी अखेरचा श्वास घेतला. ते ७० वर्षांचे होते. हरी नरके यांच्या निधनाने एक ज्वलंत अभ्यासू व्यक्तिमत्व आज आपण गमावले, अशा शब्दांमध्ये राष्ट्रवादी काँग्रेसचे अध्यक्ष शरद पवार यांनी ट्विट करत श्रद्धांजली वाहिली आहे. (Hari Narke Passes away )
शरद पवार यांनी ट्विटमध्ये म्हटलं आहे की, "मराठी लेखक, अभ्यासू संशोधक, वक्ते आणि मराठी ब्लॉगर प्रो. हरी रामचंद्र नरके यांचे दुःखद निधन झाले. पुणे विद्यापीठातील महात्मा फुले अध्यापनाचे ते अध्यासन प्राध्यापक होते. त्यांच्या निधनाने एक ज्वलंत अभ्यासू व्यक्तिमत्व आज आपण गमावले. हरी नरके हे पुण्यातील आंतरराष्ट्रीय कीर्तीच्या भांडारकर प्राच्यविद्या संस्थेवर उपाध्यक्ष होते. मराठी भाषा ही संस्कृत, कन्नड, तेलुगू या प्रमाणेच एक अभिजात भारतीय भाषा आहे हे सिद्ध करण्यासाठी नेमलेल्या रंगनाथ पठारे समितीच्या अहवालात प्रमुख समन्वयक म्हणून प्रा. हरी नरके यांनी योगदान दिले. हरी नरके यांच्या विविध नियतकालिकांमधून प्रसिद्ध झालेल्या लेखांचे विषय ज्वलंत उदाहरणे आहेत. जसे, ओबीसींमध्ये पेरली दुहीची बीजे, फॅसिस्ट शक्तीमुळे बहुजनांचे विभाजन, मराठा आरक्षण, महात्मा फुले, समाजशोध इत्यादी. त्याप्रमाणेच त्यांची पुस्तके, महात्मा फुले यांची बदनामी : एक सत्यशोधन, महात्मा फुले – शोधाच्या नव्या वाटा असे अनेक पुस्तके प्रकाशित झाली."
सुप्रिया सुळे यांनी ट्विट करत हरी नरके यांना श्रद्धांजली वाहिली आहे. त्यांनी आपल्या ट्विटमध्ये म्हटलं आहे की, "फुले-शाहू-आंबेडकरी विचारधारेचा प्रसार व प्रचार करण्यासाठी आयुष्य वेचणारे ज्येष्ठ विचारवंत लेखक प्रा. हरी नरके यांचे निधन झाल्याची बातमी धक्कादायक आहे. त्यांनी अतिशय खडतर परिस्थितीतून शिक्षण घेतले होते.अगदी तरुण वयातच त्यांनी महात्मा फुले, क्रांतीज्योती सावित्रीबाई फुले यांच्या विचारांचा प्रसार करण्यासाठी देशभरात व्याख्याने दिली. सावित्रीबाई फुले पुणे विद्यापीठातील महात्मा फुले अध्यासनाचे ते प्राध्यापक होते. तसेच महाराष्ट्र राज्य मागासवर्ग आयोगाचे ते सदस्य देखील होते. मराठी भाषेला अभिजात भाषेचा दर्जा मिळावा यासाठी नेमलेल्या रंगनाथ पठारे समितीच्या अहवालात प्रमुख समन्वयक म्हणून त्यांचे मोठे योगदान होते. यासोबतच यशवंतराव चव्हाण सेंटरच्या 'परिवर्तनाचे शिल्पकार – फुले शाहू आंबेडकर' या व्याख्यानमालेत देखील त्यांनी अतिशय मोलाचा सहभाग नोंदविला होता. यासह चव्हाण सेंटरच्या शरद पवार इनस्पायर फेलोशिप इन लिटरेचर च्या निवड समितीत मार्गदर्शक म्हणूनही भूमिका बजावली होती. त्यांच्या निधनामुळे प्रागतिक विचारांच्या चळवळीतील एक अभ्यासू व्यक्तिमत्त्व काळाच्या पडद्याआड गेले. नरके कुटुंबियांच्या दुःखात आम्ही सर्वजण सहभागी आहोत. भावपूर्ण श्रद्धांजली."
हेही वाचा
