फोंडा : पुढारी वृत्तसेवा
सरकारी नोकरी देतो म्हणून तब्बल १८ लाख रुपयांचा चुना लावलेल्या भंडारवाडा-आमोणा येथील सुहाना सुजय नाईक (वय ३९) हिला काल (शुक्रवार) फोंडा पोलिसांनी अटक केली असून ६ दिवसांचा रिमांड घेण्यात आला आहे.
उसगाव भागातून आलेल्या तक्रारीनुसार सुहाना नाईक हिला अटक करण्यात आली आहे. आरोग्य खात्यात होमिओपॅथी डॉक्टर, वाहन चालक व कारकून अशा तीन जागांसाठी मिळून एकूण १८ लाख रुपये सुहाना नाईक हिने उचलले असल्याचे स्पष्ट झाले आहे. सुहाना नाईक ही यापूर्वी आरोग्य खात्यात कंत्राटी कामावर होती.
या कामावेळी झालेल्या काही जणांच्या ओळखीचा फायदा उठवून तिने हे कृत्य केले असावे, असा पोलिसांचा कयास आहे. फोंडा पोलिसांनी संशयित सुहाना हिला ताब्यात घेऊन प्रथम श्रेणी न्याय दंडाधिकाऱ्यांसमोर उभे केले असता तिला सहा दिवसांची पोलिस कोठडी सुनावण्यात आली आहे.
सुहानाचा इतर कुणाशी संपर्क होता काय, की तीच मास्टरमाईंड आहे याचा तपास फोंडा पोलिस करीत आहे. दरम्यान, २०२५ साली कॅश फॉर जॉब प्रकरण बरेच गाजले होते. त्यावेळी पूजा नाईक, दीपश्री गावस, श्रुती प्रभुगावकर व सुनिता पावसकर अशा चार जणींना फोंडा आणि म्हार्दोळ पोलिसांनी अटक केली होती; त्यात आता सुहाना नाईक या पाचव्या संशयित आरोपीची भर पडली आहे.
