पणजी : शिरगाव येथील श्री देवी लईराईच्या मंगळवार, दि. २१ रोजी सुरु होणाऱ्या जत्रोत्सवानिमित्त शिरगावसह परिसरातील सहा गावांमधील सर्व मद्यविक्रीची दुकाने २२ एप्रिलपर्यंत दुपारी १२ वाजेपर्यंत बंद ठेवण्याचे आदेश उत्तर गोवा जिल्हाधिकारी अंकित यादव यांनी दिले आहेत. शिरगाव, मुळगाव, मये, खोर्जुवे, पैरा आणि अस्नोडा या सहा गावातील मद्याची दुकाने दि.२० एप्रिल रोजी सायंकाळी ६ वाजल्यापासून ते ते दि. २२ एप्रिल रोजी दुपारी १२ वाजेपर्यंत बंद ठेवण्याचे आदेश काढण्यात आले आहेत.
हे आदेश काढतानाच स्थानिक पोलिस आणि अबकारी विभागाला या आदेशाची कड़क अंमलबजावणी करण्याचे निर्देश जिल्हाधीकाऱ्यांनी दिले आहेत. जत्रेच्या परिसरात आणि संबंधित गावांमध्ये ठिकठिकाणी देखरेख ठेवली जाणार आहे, भाविकांनी आणि स्थानिक व्यापाऱ्यांनी या काळात प्रशासनाला पूर्ण सहकार्य करावे, असे आवाहन यादव यांनी केले आहे.
परवानाधारक आस्थापने पूर्णपणे बंद राहतील, जत्रेच्या काळात कोणताही अनुचित प्रकार घडू नये आणि भाविकांना सुरक्षित वातावरणात दर्शन घेता यावे, यासाठी अबकारी आयुक्तांच्या शिफारसीनुसार हे पाऊल उचलण्यात आल्याचे यादव यांनी म्हटले आहे.
दरम्यान, जत्रेसाठी धोंड म्हणून व्रतस्त राहणारे नागरिक व्रताचरण काळापासून ते होमकुंडातून अग्नीदिव्य करीपर्यंत मद्य, मासे व मांस वर्ज करत असतात. अग्निदिव्य करत होमकुंडातून गेल्यानंतर घरी जाऊन आंघोळ वगैरे करुन धोंड महिनाभराचा उपवास सोडतात. मात्र, परिसरातील रेट्रॉरेंट दोन दिवस बंद राहणार असल्याने त्यांना डिचोली, शिरसई येथे जावे लागणार आहे.
