वास्को:येथील विमानतळासमोरच्या दाबोळी रस्त्याकडेला शनिवारी (दि. २) रात्री उभ्या असलेल्या एका ६० वर्षीय महिलेला कारची जोरदार धडक देऊन कारसह पळ काढणाऱ्या चालकाचा वास्कोचे आमदार संकल्प आमोणकर यांनी सुमारे बारा किलोमीटर पाठलाग करून पकडले. या अपघातात मांगोरहिल येथे राहणारी सिद्धम्मा मदार (६०) यांचा मृत्यू झाला. तर कारचालकाचे नाव सचिन शैलेंद्र चोप्रा (३०) असे असून, तो मूळचा उज्जैन-मध्यप्रदेशचा आहे.
वरुणपुरी येथे राहणाऱ्या आपल्या बहिणीकडे तो आला होता. आपल्या नातेवाईकाची कार घेऊन तो बाहेर पडला होता. अपघातानंतर माणुसकी दाखविण्याऐवजी त्याने पळ काढण्याचा प्रयत्न केला. आमदार आमोणकर यांच्या सतर्कतेमुळे त्याचा प्रयत्न फसला. शनिवारी (दि. २) रात्री ९.३० च्या आसपास सचिन चोप्रा हा अतिवेगाने वेर्णाहून दाबोळीकडे येत होता, त्यावेळी महिलेला धडक बसली.
