Chief Minister Discusses Power and Housing Issues with Union Minister Manohar Lal Khattar
पणजी : मुख्यमंत्री डॉ. प्रमोद सावंत सध्या नवी दिल्ली दौऱ्यावर असून त्यांनी बुधवारी केंद्रीय गृहनिर्माण, शहरी व्यवहार व ऊर्जा मंत्री मनोहरलाल खट्टर यांची भेट घेतली. या भेटीत गोव्यातील विजेच्या समस्यांसह गृहनिर्माण व शहरी विकासाशी संबंधित विविध विषयांवर चर्चा करण्यात आली.
डॉ. सावंत यांनी सांगितले की, पंतप्रधान नरेंद्र मोदी यांच्या नेतृत्वाखालील केंद्र सरकारच्या पाठिंब्यामुळे गोव्यातील गृहनिर्माण, शहरी विकास आणि नागरिकांसह पायाभूत प्रकल्पांना गती मिळत आहे. अर्बन चॅलेंज निधी अंतर्गत गोवा सरकारने सादर केलेल्या प्रस्तावांना मंजुरी मिळावी, यासाठी खट्टर यांच्याकडे पाठपुरावा करण्यात आल्याचे त्यांनी स्पष्ट केले.
दरम्यान, मुख्यमंत्री सावंत नीती आयोगाच्या ११व्या नियामक परिषदेच्या बैठकीला उपस्थित राहणार आहेत. याचबरोबर, मोदी सरकारच्या १२ वर्षांच्या कार्यकाळानिमित्त आयोजित एनडीए आघाडीच्या बैठकीतही सावंत सहभागी होणार आहेत.
केंद्रीय मंत्री किशन रेड्डी यांचीही घेतली भेट
मुख्यमंत्री डॉ. प्रमोद सावंत यांनी दिल्लीत केंद्रीय कोळसा आणि खाण मंत्री किशन रेड्डी गंगापुरम यांची भेट घेतली. राज्याची अर्थव्यवस्था आणि त्यावर अवलंबून असलेल्या लोकांची उपजीविका मजबूत करण्यासाठी गोव्याच्या खाण क्षेत्रातील सुधारणांना केंद्राचा पाठिंबा आवश्यक असल्याचे मुख्यमंत्र्यांनी सांगितले. डॉ. सावंत यांनी खासदार मनोज तिवारी यांचीही भेट घेतली.
