म्हापसा/पर्वरी : पुढारी वृत्तसेवा
हडफडे येथील नाईट क्लबला लागलेल्या आगीची घटना ताजी असतानाच बार्देश तालुक्यात मंगळवारी पुन्हा अग्नितांडव घडले. तीन ठिकाणी लागलेल्या आगीत लाखो रुपयांचे नुकसान झाले.
पर्वरीतील 'घरान' रेस्टॉरंट भीषण आगीत जळून भस्मसात झाले, तर नायकावाडा, कळंगुट येथील बांधकाम सुरू असलेल्या सागा हॉटेलच्या गोदामाला आग लागून लाखो रुपयांचे साहित्य खाक झाले. घरान रेस्टॉरंटच्या आगीच्या दुर्घटनेमागे घातपात असल्याचा अंदाज वर्तवला जात असून, दोन्ही घटनांमध्ये सुदैवाने कुणालाही दुखापत झालेली नाही.
मंगळवारी पहाटे ४.२८ च्या सुमारास 'घरान' या बार अँड रेस्टॉरंटला आग लागली. याबाबतची माहिती मिळताच म्हापसा, पर्वरी, पणजी, पिळर्ण अग्निशमन दलाच्या जवानांनी घटनास्थळी धाव घेत तासाभराने आगीवर नियंत्रण मिळवले. तोपर्यंत सर्व रेस्टॉरंट जळून खाक झाले होते. या रेस्टॉरंटचे बांधकाम लाकडी तसेच माडाची झावळे वापरून केले होते. त्यामुळे आग लगेच भडकली.
प्रसंगावधान राखून अग्निशमन दलाच्या जवानांनी रेस्टॉरंटच्या आवारातील स्वयंपाक खोलीतील सहा गॅस सिलिंडर बाहेर काढल्यामुळे मोठी दुर्घटना टळली. दुर्घटनेमध्ये ४५ लाख रुपयांचे नुकसान झाल्याचा अंदाज आहे, तर अग्निशमन दलाला ३० लाखांची मालमत्ता वाचवण्यात यश आले आहे.
दरम्यान नायकावाडा, कळंगुट येथील बांधकाम सुरू असलेल्या निर्माणाधीन सागा हॉटेल इमारतीमधील गोदामाला आग लागली. ही दुर्घटना सकाळी ६.५० च्या दरम्यान घडली. सहा मजली हॉटेल इमारतीच्या तळमजल्यावरील गोदामाच्या खोलीमध्ये पेंट, सोफा, हार्डवेअर आणि इतर साहित्य ठेवण्यात आले होते. या साहित्याला अचानक आग लागली व ते सर्व साहित्य जळून भस्मसात झाले.
घटनेवेळी या इमारतीत कोणीही नव्हता फक्त एक सुरक्षारक्षक होता. घटनेची माहिती मिळताच अग्निशमन दलाचे स्टेशन अधिकारी दामोदर पेडणेकर यांच्या नेतृत्वाखालील पिळर्ण, पर्वरी व म्हापसा अग्निशामक दलाच्या जवानांनी घटनास्थळी धाव घेत आगीवर नियंत्रण मिळवले. मात्र, तोपर्यंत सर्व साहित्य जळाले होते.
ही दुर्घटना शॉर्ट सर्किटमुळे घडल्याचा अंदाज असला तरी घातपाताचा संशय व्यक्त करण्यात येत आहे. घटनेत लाखो रुपयांचे नुकसान झाले आहे. खोर्ली, म्हापसा येथील प्रमोद कर्पे यांच्या घराला आग लागून त्यांचे सुमारे एक लाखाचे नुकसान झाले. तीनही घटनात सुदैवाने कोणतीही जीवित हानी झाली नाही. तिन्ही घटनांचा पंचनामा म्हापसा, पर्वरी व कळंगुट पोलिसांनी केला. पुढील तपास सुरू आहे.
