पुणे : चुकीच्या पद्धतीने कर्जवितरण करणे, बँकिंग नियम पायदळी तुडविणे, आर्थिक घोळाची माहिती वेळेवर न कळविणे, अशा विविध कारणांसाठी भारतीय रिझर्व्ह बँकेने (आरबीआय) दोन बँकांसह पुण्यातील वित्त संस्थेवर दंडात्मक कारवाई केली आहे. युनियन बँकेला सर्वाधिक एक कोटी रुपयांचा दंड ठोठावण्यात आला आहे, तर आरबीएल बँक आणि बजाज फायनान्स लिमिटेडला अनुक्रमे 64 आणि साडेआठ लाख रुपये भरण्याचे आदेश दिले आहेत.
आर्थिक नियमांची पायमल्ली करणार्या बँकांवर आरबीआयने कडक कारवाई करण्यास सुरुवात केली आहे. सायबर सुरक्षा आणि केवायसीतील त्रुटींसाठी पेटीएमलाही आरबीआयने नुकताच पाच कोटी रुपयांचा दंड ठोठावला आहे. पाठोपाठ शुक्रवारी तीन बड्या वित्तीय संस्थांवर आरबीआयने कारवाई केली.
आरबीआयने 31 मार्च 2021 अखेरच्या आर्थिक स्थितीनुसार युनियन बँक ऑफ इंडियाची वैधानिक तपासणी केली. त्यात बँकेने कर्जवितरणात गंभीर त्रुटी केल्याचे आढळले. आर्थिक पडताळणी न करता कर्ज मंजूर करणे, कर्ज रकमेच्या परतफेडीची शक्यता न तपासणे, अशा गंभीर त्रुटी समोर आल्या. याप्रकरणी आरबीआयने बँकेला कारणे दाखवा नोटीस बजावली होती. या नोटिशीला बँकेने उत्तर दिले. त्यावर सुनावणी झाली. बँकेने आरबीआयच्या निर्देशांचे उल्लंघन केल्याचे स्पष्ट झाल्याने बँकेला तब्बल एक कोटी रुपयांचा दंड ठोठावण्यात आला.
खासगी क्षेत्रातील आरबीएल बँकेचीही 31 मार्च 2020 अखेरच्या स्थितीनुसार वैधानिक तपासणी केली. बँकेचे शेअर आणि मतदान हक्क संपादनाबाबत आरबीआयची पूर्वपरवानगी घेणे आवश्यक असते. या निर्देशाचे उल्लंघन झाल्याचे आरबीआयच्या पाहणीत समोर आले. याप्रकरणी समाधानकारक खुलासा प्राप्त न झाल्याने आरबीआयने आरबीएल बँकेला 64 लाखांचा दंड ठोठावला.
आरबीआयने पुण्यातील बजाज फायनान्स लिमिटेडची 31 मार्च 2022च्या आर्थिक अहवालानुसार तपासणी केली. त्यात बजाज फायनान्सने मॉनिटरिंग ऑफ फ्रॅाड्स इन एनबीएफसीज् डायरेक्शन-2016 चा भंग केल्याचे दिसून आले. संस्थेतील आर्थिक घोळाची माहिती आरबीआयला वेळेत न कळविल्याने बजाज फायनान्सला साडेआठ लाख रुपयांदा दंड ठोठावला.
हेही वाचा
