TVS Jupiter 110 Price Hike Updates: स्कूटर घेण्याचा विचार करत असाल, तर ही बातमी तुमच्यासाठी महत्त्वाची आहे. लोकप्रिय 110cc स्कूटर TVS Jupiter 110 च्या किमती वाढवण्यात आल्या आहेत. दुचाकी उत्पादक कंपनी TVS Motor Company ने आपल्या अनेक मॉडेल्सच्या दरात वाढ केली असून, त्यात Jupiter 110 चाही समावेश आहे.
नव्या दरवाढीनुसार TVS Jupiter 110 च्या वेगवेगळ्या व्हेरिएंट्सवर 2,950 रुपयांपासून ते 3,250 रुपयांपर्यंत वाढ झाली आहे. त्यामुळे आता ही स्कूटर खरेदी करताना ग्राहकांना आधीपेक्षा जास्त पैसे खर्च करावे लागणार आहेत.
कंपनीने दिलेल्या माहितीनुसार, Jupiter 110 चा बेस ड्रम व्हेरिएंट आता ₹75,600 (एक्स-शोरूम) रुपयांना मिळणार आहे. याआधी याची किंमत ₹72,650 होती. म्हणजेच या व्हेरिएंटवर थेट ₹2,950 ची वाढ झाली आहे.
तर स्कूटरच्या टॉप-एंड स्पेशल एडिशन मॉडेलमध्ये सर्वाधिक दरवाढ करण्यात आली आहे. या व्हेरिएंटची किंमत ₹85,650 वरून थेट ₹88,900 (एक्स-शोरूम) इतकी झाली असून, तब्बल ₹3,250 ने भाव वाढले आहेत.
ही दरवाढ केवळ Jupiter 110 पुरती मर्यादित नाही. कंपनीने Star City Plus, Radeon आणि Ntorq 125 या मॉडेल्सच्या किमतीही वाढवल्या आहेत.
कंपनीकडून सांगण्यात आलं आहे की, कच्च्या मालाच्या वाढलेल्या किमती, महागाई, डॉलर-रुपया विनिमय दरातील चढ-उतार आणि उत्पादन खर्चात झालेली वाढ, या सगळ्याचा परिणाम दुचाकींच्या किमतींवर झाला आहे. त्यामुळे ही दरवाढ करण्यात आली आहे.
सध्या केवळ TVS नव्हे, तर देशातील अनेक वाहन उत्पादक कंपन्यांनी मागील काही आठवड्यांत वाहनांच्या किमती वाढवल्या आहेत.
थोडक्यात सांगायचं तर, जर तुम्ही TVS Jupiter 110 खरेदी करण्याचा विचार करत असाल, तर आता तुम्हाला आधीपेक्षा किमान तीन हजार रुपये अधिक मोजावे लागतील. त्यामुळे स्कूटर घेण्याआधी नव्या किमतींची माहिती नक्की घ्या.
