ED Raid on former VVMC (Vasai Virar Municipal Corporation) Commissioner Anil Kumar Pawar
नाशिक : वसई-विरार महापालिकेचे माजी आयुक्त अनिलकुमार पवार यांच्या जिल्ह्यातील विविध भागांत असलेल्या मालमत्ता सक्तवसुली संचलनालयाने (ईडी) जप्त केल्याची माहिती समोर येत आहे. ईडीने सलग तिसऱ्या दिवशी कारवाईचा धडाका सुरू ठेवताना, अनिलकुमार यांच्या जिल्ह्यातील नातेवाइकांचीही चौकशी केल्याची माहिती समोर येत आहे.
गेल्या मंगळवारी (दि. २९) ईडीने माजी आयुक्त अनिलकुमार पवार यांच्या वसई येथील दीनदयाळ नगरातील शासकीय निवासस्थानासह नाशिकमधील निवासस्थानाची झाडाझडती घेतली होती. यावेळी प्राप्त कागदपत्रांच्या आधारे पवार यांच्या जिल्ह्यातील इतर भागांतही मालमत्ता असल्याचे समोर आले होते.
त्यानुसार ईडीच्या पथकाने बुधवारी (दि. ३०) पाथर्डी फाटा परिसरातील पांडवलेण्याच्या पायथ्याशी असलेल्या ४१३.२५ चौ. मीटरच्या बिगरशेती भूखंडाची पाहणी केली होती. हा भूखंड पवार यांचा पुतण्या तुषार विजय पवार याच्या नावे होता. त्याने आजी निर्मलाबाई पवार यांना भेट दिला. नंतर त्यांच्या इच्छेनुसार निर्मलाबाई पवार यांनी आपले पुत्र अनिलकुमार पवार यांना हा भूखंड गिफ्ट दिला होता. ईडीच्या पथकाने आता हा भूखंड जप्त केल्याची माहिती समोर येत आहे. याशिवाय बागलाण तालुक्यातील सटाण्याजवळील खामताणे गाव येथे ०.४१ व ०.४५ हेक्टर जमिनीवर सुमारे चारशे चौरस फुटांचे फार्म हाउस, बागलाण तालुक्यातील आराई गावात पवार यांच्या नावे असलेल्या तिन्ही भूखंड पथकाने जप्त केल्याची माहिती समोर येत आहे. याशिवाय सटाणा येथे असलेल्या त्यांच्या एका फ्लॅटमधील काही महत्त्वाची कागदपत्रेही ईडीच्या पथकाने जप्त केल्याची माहिती समोर येत आहे.
दरम्यान, ईडीच्या पथकाने मंगळवारी (दि.29) अनिलकुमार पवार यांच्या काही नातेवाइकांकडेही चौकशी केली हाेती. ही चौकशी बुधवारीही (दि.30) सुरूच होती. त्यामुळे अनिलकुमार पवार यांच्या अडचणी वाढण्याची शक्यता वर्तविली जात आहे.
ईडीने तब्बल दोन दिवस पवार यांच्या नाशिक आणि वसईमधील मालमत्तांची चौकशी केली. त्याबाबतच्या कागदपत्रांची तसेच प्रत्यक्ष पाहणी करून तपास केला. त्यात मालमत्तांबाबत अनियमितता असल्याच्या संशंयातून जप्तीची कारवाई केल्याची माहिती सूत्रांनी दिली आहे. सध्या ईडीकडून या मालमत्तांचा इत्यंभूत तपशील गोळा केला जात आहे. ईडीची ही कारवाई आर्थिक गैरव्यवहारांशी संबंधित आहे.
