मारुती सुझुकीने २०२५ मध्ये केवळ Victoris मिडसाईज एसयूव्ही ही एकमेव कार लाँच केली होती
नवीन वर्षात इलेक्ट्रिक कार होणार लाँच
मारुती सुझुकी फ्रॉन्क्स फ्लेक्स फ्यूलमध्ये ८५ टक्के पर्यंत इथेनॉल आणि उर्वरित १५ टक्के पेट्रोल असलेले मिश्रण वापरता येईल.
Maruti Suzuki 2026 New Car Launches:
भारतीय बाजारात मारुती सुझुकी कंपनी ही नवीन वर्षात चार नवीन कार्स लाँच (अनावरण) करणार आहे. यामध्ये दोन इलेक्ट्रिक कार्सचाही समावेश आहे. मारुती सुझुकीने २०२५ मध्ये केवळ Victoris मिडसाईज एसयूव्ही ही एकमेव कार लाँच केली होती. आता आगामी वर्षांत स्पर्धक कंपन्यांना टक्कर देण्यासाठी कंपनी चार नवीन कार बाजारात उतरविणार आहे. यामधील दोन दोन इलेक्ट्रिक वाहने (EV), एक फ्लेक्स-फ्यूल एसयूव्ही आणि ब्रेझाचा फेसलिफ्ट व्हर्जनचा समावेश आहे. जाणून घेवूया या नवीन कार्सविषयी....
'ऑटोकार इंडिया'ने दिलेल्या माहितीनुसार, मारुती सुझुकी नवीन वर्षी पहिली इलेक्ट्रिक कार मारुती सुझुकी ई विटारा ईव्ही (Maruti Suzuki e Vitara EV) जानेवारी २०२६ मध्ये देशात लाँच होण्याची शक्यता आहे. ही इलेक्ट्रिक एसयूव्ही महिंद्रा बीई ६, ह्युंदाई क्रेटा इलेक्ट्रिक, एमजी झेडएस ईव्ही, टाटा कर्व्ह ईव्ही आणि विनफास्ट व्हीएफ६ या सारख्या गाड्यांशी थेट स्पर्धा करेल. या गाडीत दोन प्रकारच्या बॅटरी निवडण्याचा पर्याय असेल - एक ४९ युनिट्स (kWh) ची आणि दुसरी ६१ युनिट्स (kWh) ची मोठी बॅटरी उपलब्ध असेल. इलेक्ट्रिक मोटर समोरच्या बाजूला असेल. बॅटरी एकदा चार्ज झाल्यानंतर गाडी ५४३ किलोमीटर अंतरपर्यंत जाऊ शकेल, असा कंपनीचा दावा आहे. या गाडीला ५-स्टार भारत NCAP सुरक्षा रेटिंग मिळाली आहे. तसेच जलद चार्जिंगची सुविधा आहे, ज्यामुळे बॅटरी लवकर चार्ज होण्यास मदत होईल.
मारुती सुझुकी फ्रॉन्क्स फ्लेक्स फ्यूल (Maruti Suzuki Fronx Flex Fuel) ही पुढील वर्षी पहिल्या सहामहिन्यात लाँच होण्याची शक्यता आहे. या गाडीसाठी फ्लेक्स-फ्यूल इंजिन हे एक नवीन आणि विशेष प्रकारचे इंजिन असेल. हे इंजिन केवळ पेट्रोलवरच नाही, तर पेट्रोल आणि इथेनॉलच्या मिश्रणावरही चालू शकते. या गाडीमध्ये ८५ टक्के पर्यंत इथेनॉल आणि उर्वरित १५ टर्कंके पेट्रोल असलेले मिश्रण (E85) वापरता येईल. यामुळे पूर्णपणे पेट्रोल गाडीपेक्षा प्रदूषण (धूर आणि उत्सर्जन) कमी होते. या धोरणामुळे केंद्र सरकारच्या इथेनॉल वापराला प्रोत्साहन देण्यासाठी बनवलेल्या धोरणालाही मदत मिळणार आहे. नवीन इंजिन आणि इतर सुविधा असलेली ही कार सध्या बाजारात असलेल्या Fronx मॉडेलप्रमाणेच असतील.
मारुती सुझुकी वायएमसी इलेक्ट्रिक एमपीव्ही (Maruti Suzuki YMC Electric MPV) ही नवी कार २०२६ या वर्षातील शेवटच्या तिमाहीत लाँच होण्याची शक्यता आहे. कंपनीची ही दुसरी इलेक्ट्रिक कार आहे आणि पहिली ऑल-इलेक्ट्रिक MPV असेल. ही नवीन इलेक्ट्रिक कार मारुतीच्या सध्याच्या Ertiga (अर्टिगा) आणि XL6 (एक्सएल६) या गाड्यांपेक्षा अधिक उच्च श्रेणीत (प्रीमियम सेगमेंटमध्ये) ठेवली जाईल. ही गाडी मारुतीच्या आगामी ई विटारा इलेक्ट्रिक गाडीच्या (e Vitara EV) मूळ रचनेवर तयार केली जाईल. ४९ युनिट्स (kWh) आणि ६१ युनिट्स (kWh) ची अशा दोन प्रकारच्या बॅटरी निवडण्याची सोय असेल. पूर्ण चार्चिंग झाल्यानंतर ही कार साधारणपणे ५०० ते ५५० किलोमीटरपर्यंत धावेल असा अंदाज आहे.
नवीन वर्षाच्या मध्यात मारुती सुझुकी कंपनी आपली लोकप्रिय कॉम्पॅक्ट एसयूव्ही ब्रेझाचा (Brezza) सुधारित 'फेसलिफ्ट' व्हर्जन (Maruti Suzuki Brezza Facelift) लाँच करेल. यामध्ये किरकोळ डिझाइन बदल दिसू शकतात. गाडीच्या बाह्य डिझाइनमध्ये (उदा. बंपर, हेडलाइट्स) थोडा नवा लूक दिला जाईल. आतील केबिन अधिक चांगला आणि आकर्षक केला जाईल. तसेच, यात काही नवीन सुविधा (फीचर्स) जोडल्या जातील. १.५-लीटर पेट्रोल इंजिन (जे १०३ हॉर्सपॉवर ताकद देते) पूर्वीप्रमाणेच कायम राहील. मॅन्युअल आणि ऑटोमॅटिक (आपोआप गिअर बदलणारा) अशा दोन्ही गिअरबॉक्सचे पर्याय उपलब्ध असतील. तसेच ही गाडीचा CNG व्हर्जनवर उपलब्ध असेल.
एकूणच आगामी २०२६ वर्ष हे मारुती सुझुकी कंपनीसाठी खूप महत्त्वाचे ठरणार आहे. तसेच ग्राहकांसाठीही अनेक उत्तम पर्याय उपलब्ध होणार आहेत.
