Stock Market Today: गेल्या सात दिवसांपासून सुरू असलेल्या शेअर बाजारातील घसरणीला आज ब्रेक लागल्याचे दिसून आले. बाजाराने आज जोरदार सुरुवात केली असून निफ्टी आणि सेन्सेक्स दोन्ही निर्देशांक मोठ्या वाढीसह उघडले.
गुरुवारी सकाळी निफ्टी 147 अंकांनी वाढून 24,225 वर खुला झाला. तर सेन्सेक्समध्ये तब्बल 539 अंकांची वाढ झाली आणि तो 77,449 वर उघडला. मागील सात दिवस बाजारावर विक्रीचा दबाव होता. मात्र आजच्या सुरुवातीच्या व्यवहारात गुंतवणूकदारांचा उत्साह वाढलेला दिसून आला.
बुधवारी निफ्टीमध्ये 77 अंकांची घसरण झाली होती आणि तो 24,078 अंकांवर बंद झाला होता. मात्र गुरुवारी परिस्थिती बदलली आणि बाजारात जवळपास सर्वच क्षेत्रांमध्ये तेजी दिसून आली.
आज बाजारात सर्व बाजूंनी रिकव्हरी पाहायला मिळत आहे. ऑइल अँड गॅस इंडेक्स वगळता जवळपास सर्व प्रमुख क्षेत्रीय निर्देशांक हिरव्या रंगात व्यवहार करत होते. विशेषतः आयटी, फायनान्शियल आणि FMCG क्षेत्रातील शेअर्समध्ये चांगली वाढ दिसून आली. सेन्सेक्समधील टॉप 30 कंपन्यांपैकी केवळ महिंद्रा अँड महिंद्रा हा शेअर सुरुवातीच्या व्यवहारात घसरणीसह दिसत होता. इतर बहुतांश शेअर्समध्ये खरेदीचा उत्साह होता.
भारतीय बाजारातील तेजीमागे अमेरिकेतील काही घडामोडी महत्त्वाच्या मानल्या जात आहेत. अमेरिकन बाजारात तीन दिवस सुरू असलेल्या घसरणीलाही ब्रेक लागला आहे.
अमेरिकेच्या फेडरल रिझर्व्हने दीर्घ मुदतीच्या कर्जाच्या बायबॅकची मर्यादा दुप्पट केल्याचे सांगितले जात आहे. बाजारातील काही तज्ज्ञ याकडे क्वांटिटेटिव्ह इझिंग म्हणजे QE पुन्हा सुरू होण्याची शक्यता म्हणून पाहत आहेत. त्यामुळे जागतिक बाजारातील गुंतवणूकदारांचा विश्वास वाढल्याचे दिसत आहे.
सोप्या भाषेत सांगायचे झाल्यास, QE म्हणजे अर्थव्यवस्थेला आणि आर्थिक व्यवस्थेला अधिक तरलता उपलब्ध करून देण्यासाठी मध्यवर्ती बँकेकडून केले जाणारे उपाय. अशा उपायांमुळे बाजारात पैशाचा प्रवाह वाढण्याची अपेक्षा असते आणि त्याचा शेअर बाजाराच्या वातावरणावर सकारात्मक परिणाम होऊ शकतो.
भारतीय बाजाराबरोबरच आशियाई बाजारांमध्येही तेजी दिसून आली. दक्षिण कोरियाच्या KOSPI निर्देशांकात तब्बल 5.7 टक्क्यांची वाढ झाली. तर जपानच्या निक्केई निर्देशांकात सुमारे 1 टक्क्यांची वाढ झाली. जागतिक बाजारातील ही सकारात्मक परिस्थिती भारतीय शेअर बाजारासाठीही आधार ठरत असल्याचे दिसून येत आहे.
आजच्या बाजारातील सकारात्मक सुरुवातीमागे अनेक कारणे आहेत. GIFT NIFTY मध्ये सुरुवातीला सुमारे 170 अंकांची मोठी वाढ दिसून आली. त्यामुळे भारतीय बाजार तेजीसह उघडण्याचे संकेत आधीच मिळाले होते.
सात दिवसांपासून सुरू असलेल्या घसरणीनंतर बाजारात रिकव्हरीची अपेक्षा वाढली होती. याशिवाय अमेरिकेत QE परत येण्याची शक्यता हा बाजारासाठी मोठा सकारात्मक ट्रिगर ठरला आहे.
दरम्यान, परदेशी आणि देशांतर्गत संस्थात्मक गुंतवणूकदारांनीही बुधवारी खरेदी केली. FII ने कॅश मार्केटमध्ये सुमारे 408 कोटी रुपयांची खरेदी केली, तर DII ने तब्बल 3,973 कोटी रुपयांची खरेदी केल्याची माहिती आहे. सातत्याने घसरण होत असलेल्या बाजारात संस्थात्मक गुंतवणूकदारांकडून झालेली खरेदी बाजारातील वातावरण सुधारण्यासाठी महत्त्वाची मानली जात आहे.
दुसरीकडे कच्च्या तेलाच्या किमतीत वाढ कायम आहे. क्रूड ऑइलचा दर 92 डॉलर प्रति बॅरलच्या पुढे असल्याचे सांगितले जात आहे. वाढत्या कच्च्या तेलाचे दर भारतासाठी चिंतेची बाब ठरू शकतात. कारण भारत मोठ्या प्रमाणावर कच्च्या तेलाची आयात करतो. त्यामुळे तेलाचे दर आणखी वाढल्यास महागाई आणि कंपन्यांच्या खर्चावर परिणाम होऊ शकतो.
याशिवाय अमेरिकेने इराणविरोधात मोठ्या आर्थिक निर्बंधांची घोषणा केल्याने जागतिक बाजारातील भू-राजकीय परिस्थितीकडेही गुंतवणूकदारांचे लक्ष आहे.
