Stock Market Today: भारतीय शेअर बाजाराने आठवड्याच्या दुसऱ्या व्यवहाराच्या दिवशीही सकारात्मक सुरुवात केली. विकली एक्सपायरीच्या दिवशी मंगळवारी निफ्टी 34 अंकांच्या वाढीसह 24,464 वर, तर सेन्सेक्स 176 अंकांनी वधारून 78,461 वर उघडला. यासह बाजारात सलग पाचव्या सत्रात तेजी कायम राहिली आहे.
जुलै महिन्याच्या सुरुवातीपासूनच बाजारात खरेदीचा कल दिसून येत आहे. आतापर्यंतच्या चार व्यवहार सत्रांमध्ये निफ्टीमध्ये सुमारे 565 अंकांची वाढ झाली आहे. सोमवारी निफ्टी 24,430 या पातळीवर बंद झाला होता.
सकाळच्या व्यवहारात आयटी क्षेत्रातील शेअर्समध्ये सर्वाधिक 1.7 टक्क्यांची वाढ दिसून आली. याशिवाय ऑटो, फायनान्शियल सर्व्हिसेस, पीएसयू बँक आणि फार्मा क्षेत्रातील शेअर्समध्येही चांगली खरेदी झाली.
दुसरीकडे मेटल क्षेत्रातील शेअर्समध्ये सुमारे 1.1 टक्क्यांची घसरण झाली. सिमेंट आणि केमिकल्स क्षेत्रातही दबाव पाहायला मिळाला.
आजच्या सुरुवातीच्या व्यवहारात इन्फोसिस हा निफ्टीमधील सर्वाधिक वाढणारा शेअर ठरला. त्याशिवाय श्रीराम फायनान्स, टायटन, एसबीआय लाइफ आणि HCL टेक्नॉलॉजीज यांच्या शेअर्समध्येही चांगली तेजी दिसून आली.
तर ट्रेंटच्या शेअरमध्ये सुमारे 9 टक्क्यांची घसरण झाली. याशिवाय BEL, इंडिगो, लार्सन अँड टुब्रो (L&T) आणि JSW स्टील यांच्या शेअर्सवरही विक्रीचा दबाव राहिला.
आजच्या व्यवहारात काही महत्त्वाच्या जागतिक आणि देशांतर्गत घडामोडींचा बाजारावर प्रभाव दिसून आला.
GIFT Nifty मध्ये वाढ होऊन तो 25,500 च्या पुढे गेला.
अमेरिकन शेअर बाजारात तेजी कायम राहिली असून डाऊ जोन्सने विक्रमी उच्चांक गाठला.
मात्र जपानचा निक्केई आणि दक्षिण कोरियाचा कोस्पी निर्देशांक घसरल्याने आशियाई बाजारांमध्ये मिश्र वातावरण होते.
आंतरराष्ट्रीय बाजारात कच्च्या तेलाचा भाव 72.5 डॉलर प्रति बॅरलच्या आसपास स्थिर राहिला.
परदेशी संस्थात्मक गुंतवणूकदारांनी (FII) मागील सत्रात 243 कोटी रुपयांची, तर देशांतर्गत संस्थात्मक गुंतवणूकदारांनी (DII) 3,791 कोटी रुपयांची खरेदी केली.
तज्ज्ञांच्या मते, सलग दुसऱ्या दिवशी एफआयआयची खरेदी, देशांतर्गत फंडांची गुंतवणूक, कच्च्या तेलाच्या किमती नियंत्रणात राहणे आणि मान्सूनचा वेग वाढणे हे बाजारासाठी सकारात्मक घटक ठरत आहेत. तसेच खासगी बँकिंग शेअर्समधील खरेदीमुळे निर्देशांकाला आधार मिळत आहे.
दुसरीकडे, आशियाई बाजारातील घसरण, रुपयातील घसरण आणि बाजारातील 'ओव्हरबॉट' स्थितीमुळे गुंतवणूकदार सावध आहेत. तसेच मोठ्या प्रमाणावर येणारे IPO, QIP आणि OFS यांचाही बाजारातील तरलतेवर परिणाम होऊ शकतो.
तांत्रिक विश्लेषकांच्या मते, निफ्टीने 24,200 च्या महत्त्वाच्या प्रतिकार पातळीवर निर्णायक ब्रेकआउट दिला आहे. तसेच निर्देशांकाने 200 दिवसांच्या EMA च्या वर बंद होणे हा सकारात्मक संकेत मानला जात आहे.
आता 24,400 ते 24,500 हा महत्त्वाचा प्रतिकार क्षेत्र असेल. हा टप्पा पार झाल्यास निफ्टी 25,000 च्या पुढे जाऊन 25,150 पर्यंत मजल मारू शकतो, असा अंदाज व्यक्त केला जात आहे. तर अल्पकालीन आधार 24,300 या पातळीवर असल्याचे तज्ज्ञांचे मत आहे.
