Stock Market Opening Updates
भारतीय शेअर बाजाराची बुधवारी (दि.२८ मे) सलग दुसऱ्या दिवशी घसरणीसह सुरुवात झाली. सुरुवातीच्या व्यवहारात सेन्सेक्स २०० हून अधिक अंकांनी घसरून ८१,३५० च्या खाली आला. तर निफ्टी ५० निर्देशांक ६५ अंकांच्या किरकोळ घसरणीसह २४,७६०० वर व्यवहार करत आहे.
मुख्यतः एफएमसीजी सेक्टरमध्ये (Nifty FMCG) विक्रीचा अधिक दबाव दिसून आला. निफ्टी एफएमसीजी १.३ टक्के घसरला. निफ्टी ऑटो आणि मेटलवरही दबाव दिसून येत आहे. तर निफ्टी आयटी, एनर्जीमध्ये तेजी दिसून आली. निफ्टी स्मॉलकॅप १०० आणि पीएसयू बँक निर्देशांकही वाढून खुले झाले आहेत.
सेन्सेक्सवर आयटीसी, इंडसइंड बँक, नेस्ले इंडिया, टायटन, मारुती, कोटक बँक हे शेअर्स घसरणीसह खुले झाले आहेत. तर दुसरीकडे इन्फोसिस, टाटा मोटर्स, भारती एअरटेल हे शेअर्स वाढले आहेत.
ग्राहकोपयोगी वस्तू क्षेत्रातील आघाडीची कंपनी आयटीसीचा शेअर्स आज गडगडला. हा शेअर्स ३ टक्क्यांहून अधिक घसरला. ब्रिटिश अमेरिकन टोबॅकोने मंगळवारी ब्लॉक डीलद्वारे या कंपनीतील २.६ हिस्सा विकणार असल्याचे जाहीर केले होते. या पार्श्वभूमीवर ITC चा शेअर्स खाली आला.
भारतीय शेअर बाजारात मंगळवारी (दि.२७) घसरण झाली होती. बीएसई सेन्सेक्स ६२४ अंकांनी घसरून ८१,५५१ वर बंद झाला होता. तर निफ्टी ५० निर्देशांक १७४ अंकांच्या घसरणीसह २४,८२६ वर बंद झाला होता. आज सलग दुसऱ्या दिवशी बाजारात घसरण झाली.
