Stock Market Closing Updates
भारतीय शेअर बाजारात शुक्रवारी घसरणीसह बंद झाला. हेवीवेट फायनान्सियल आणि आयटी शेअर्स घसरणीचा फटका काही प्रमाणात बाजाराला बसला. सेन्सेक्स २०० अंकांनी घसरून ८२,३३० वर बंद झाला. तर निफ्टी ५० निर्देशांक ४२ अंकांच्या किरकोळ घसरणीसह २५,०१९ वर स्थिरावला. गुंतवणूकदार प्रॉफिट बुकिंगकडे वळल्याने त्याचा दबाव आज बाजारात दिसून आला.
सेन्सेक्सवर भारती एअरटेल, एचसीएल टेक, एसबीआय, इन्फोसिस, टेक महिंद्रा, टीसीएस हे शेअर्स घसरले. तर इर्टनल, हिंदुस्तान युनिलिव्हर, एशियन पेंट्स, आयटीसी, नेस्ले इंडिया या शेअर्सनी तेजीत व्यवहार केला.
दरम्यान, स्मॉलकॅप आणि मिडकॅप शेअर्समध्ये सलग पाचव्या दिवशी तेजी दिसून आली. बीएसई मिडकॅप ०.८ टक्के आणि स्मॉलकॅप १.१ टक्के वाढून बंद झाला.
निफ्टी आयटी निर्देशांक ०.८ टक्के घसरला. तर निफ्टी फायनान्सियल सर्व्हिसेस निर्देशांक सपाट पातळीवर बंद झाला. चीनसोबत व्यापार करार केल्यानंतर अमेरिकेतील मंदीची चिंता कमी झाली आहे. यामुळे गेल्या दिवसांत आयटी निर्देशांक वाढला होता. पण आज त्यावर विक्रीचा दबाव राहिला.
संरक्षण क्षेत्रातील कंपन्यांच्या शेअर्समध्ये सलग सहाव्या दिवशी तेजीचा माहौल राहिला.
दरम्यान, आजच्या सत्रात बाजारात घसरण झाली असतानाही बीएसई सूचीबद्ध कंपन्यांच्या बाजार भांडवलात २.५५ लाख कोटी रुपयांची वाढ झाली. शुक्रवारी १६ मे रोजी बीएसई सूचीबद्ध कंपन्यांचे बाजार भांडवल ४४२.७४ लाख कोटी रुपयांवर पोहोचले. जे याआधी १५ मे रोजी ४४०.१९ लाख कोटी रुपये होते. याचाच अर्थ आज गुंतवणूकदारांच्या कमाईत २.५५ लाख कोटी रुपयांची वाढ झाली.
भू-राजकीय तणाव हळूहळू निवळत आहे. त्याचबरोबर परदेशी संस्थात्मक गुंतवणूकदारांनी देशांतर्गत शेअर बाजारात ओघ कायम ठेवल्याने गेल्या पाच सत्रांत सेन्सेक्स आणि निफ्टी ५० निर्देशांकांनी चार टक्क्यांची वाढ नोंदवली.
परदेशी संस्थात्मक गुंतवणूकदारांनी पुन्हा एकदा खरेदीवर जोर दिला आहे. त्यांनी गुरुवारी एका दिवशी ५,३९३ कोटी रुपयांच्या भारतीय शेअर्सची खरेदी केली. ही गेल्या महिनाभरातील एका दिवसातील सर्वात मोठा खरेदीचा आकडा आहे.
