पुढारी ऑनलाईन डेस्क
भारतीय शेअर बाजारातील (Stock Market) गेल्या ४ सत्रांतील घसरण थांबली असून सेन्सेक्स (Sensex) आणि निफ्टी (Nifty) सोमवारी वाढून बंद झाले. विशेष बाजारात आज जोरदार रिकव्हरी दिसून आली. सेन्सेक्स ३७५ अंकांनी वाढून ८१,५५९ वर बंद झाला. तर निफ्टी ८४ अंकांच्या किरकोळ वाढीसह २४,९३६ वर स्थिरावला. आजच्या ट्रेडिंग सत्रात बँक आणि एफएमसीजी (FMCG) शेअर्स सर्वाधिक तेजीत राहिले. निफ्टी एफएमसीजी निर्देशांक २ टक्के आणि निफ्टी बँक १ टक्के वाढला.
शेअर बाजारात जोरदार रिकव्हरी.
सेन्सेक्स ३७५ अंकांनी वाढून ८१,५५९ वर बंद.
निफ्टी ८४ अंकांच्या किरकोळ वाढीसह २४,९३६ वर स्थिरावला.
निफ्टी एफएमसीजी निर्देशांक २ टक्के आणि निफ्टी बँक १ टक्के वाढला.
मिडकॅप निर्देशांक ०.२ टक्के, स्मॉलकॅप ०.६ टक्क्यांनी घसरुन बंद.
गेल्या आठवड्यातील नोकऱ्यांबाबतच्या अहवालाने अमेरिकेतील संभाव्य मंदीचे संकेत दिले आहेत. असे असूनही आज त्याचा भारतीय बाजारात फारसा परिणाम दिसून आला नाही. सेन्सेक्स आणि निफ्टी तेजीत बंद झाले.
क्षेत्रीय निर्देशांकात कॅपिटल गुड्स, आयटी, मेटल, टेलिकॉम, मीडिया, ऑईल आणि गॅस, पॉवर, रियल्टी ०.५ ते १ टक्क्याने घसरले. बीएसई (BSE) मिडकॅप निर्देशांक ०.२ टक्के आणि स्मॉलकॅप निर्देशांक ०.६ टक्क्यांनी घसरुन बंद झाला.
सेन्सेक्सवर हिंदुस्तान युनिलिव्हर, आयसीआयसीआय बँक, आयटीसी, कोटक बँक, इंडसइंड बँक, ॲक्सिस बँक, एचडीएफसी बँक हे शेअर्स वधारुन बंद झाले. तर टेक महिंद्रा २.६ टक्क्यांनी घसरला. त्याचबरोबर टाटा स्टील, एनटीपीसी, टाटा मोटर्स, पॉवर ग्रिड, टायटन हे शेअर्स घसरले.
निफ्टीवर हिंदुस्तान युनिलिव्हर, श्रीराम फायनान्स, आयसीआयसीआय बँक, आयटीसी, ब्रिटानिया हे शेअर्स टॉप गेनर्स राहिले. तर ओएनजीसी, टेक महिंद्रा, बीपीसीएल, टाटा स्टील, हिंदाल्को हे टॉप लू़जर्स ठरले.
