Petrol-Diesel Price Hike: देशभरात पेट्रोल आणि डिझेलच्या दरांमध्ये पुन्हा वाढ करण्यात आली असून सर्वसामान्यांच्या खिशावर महागाईचा आणखी भार पडला आहे. मंगळवारी पेट्रोल-डिझेलच्या किमतीत सुमारे 90 पैशांनी प्रति लिटर वाढ करण्यात आली. विशेष म्हणजे, गेल्या पाच दिवसांतील ही दुसरी दरवाढ आहे. यामुळे आता इंधनाचे दर 2022 प्रमाणे टप्प्याटप्प्याने सतत वाढणार का, याबाबत चर्चा सुरू झाली आहे.
याआधी 15 मे रोजी तेल कंपन्यांनी जवळपास चार वर्षांनंतर पेट्रोल-डिझेलचे दर वाढवत प्रति लिटर 3 रुपयांची वाढ केली होती. त्यानंतर 19 मे रोजी पुन्हा 90 पैशांची वाढ करण्यात आली.
या ताज्या वाढीनंतर दिल्लीत पेट्रोलचा दर 98.64 रुपये प्रति लिटर, तर डिझेल 91.58 रुपये प्रति लिटर झाला आहे. मुंबईत पेट्रोल 107.59 रुपये आणि डिझेल 94.08 रुपये प्रति लिटरवर पोहोचले आहे.
इंडियन ऑइल कॉर्पोरेशनच्या (IOCL) एका वरिष्ठ अधिकाऱ्याने सांगितले की, ग्राहकांवर अचानक मोठा आर्थिक भार पडू नये आणि महागाई नियंत्रणात राहावी यासाठी इंधन दर हळूहळू वाढवले जात आहेत.
अधिकाऱ्यांच्या म्हणण्यानुसार, “ग्राहकांना शक्य तितका दिलासा द्यायचा आहे. त्यामुळे दरवाढ एकाच वेळी करण्याचा आमचा विचार नाही. जागतिक परिस्थिती पाहता काही प्रमाणात दरवाढ आवश्यक आहे.”
मात्र, एकूण किती दरवाढ होईल, याचा अंतिम आकडा अद्याप ठरलेला नसल्याचेही त्यांनी स्पष्ट केले. हा निर्णय उच्च स्तरावर घेतला जाईल, असे संकेत देण्यात आले आहेत.
तेल कंपन्यांच्या मते, पश्चिम आशियातील तणाव, मध्यपूर्वेतील युद्धस्थिती आणि होर्मुझ सामुद्रधुनीवरील अनिश्चिततेमुळे कच्च्या तेलाच्या किमती वाढल्या आहेत. त्यामुळे इंधन दर वाढवण्याचा निर्णय घ्यावा लागला. दरवाढीनंतरही उन्हाळ्यात इंधनाची मागणी वाढत राहण्याची शक्यता असल्याचा अंदाज तेल कंपन्यांनी व्यक्त केला आहे.
रशिया-युक्रेन युद्धाच्या काळात 2022 मध्ये तेल कंपन्यांनी सलग 13 दिवस पेट्रोल-डिझेलचे दर वाढवले होते. त्या वेळी अवघ्या 15 दिवसांत जवळपास 10 रुपयांनी दर वाढले होते.
मात्र, सध्याच्या परिस्थितीची तुलना 2022 शी करणे योग्य नसल्याचे तेल कंपन्यांच्या अधिकाऱ्यांनी सांगितले. तरीही टप्प्याटप्प्याने दरवाढ सुरू राहण्याची शक्यता नाकारता येत नाही.
पेट्रोल-डिझेलच्या दरवाढीचा थेट परिणाम महागाईवर होऊ शकतो. इंधन महागल्याने वाहतूक खर्च वाढतो आणि त्याचा परिणाम अन्नधान्य, वस्तू आणि सेवांच्या किमतींवरही दिसून येतो. त्यामुळे पुढील काही महिन्यांत महागाई वाढण्याची शक्यता व्यक्त केली जात आहे.
