Stock Market Today: मंगळवारी झालेल्या मोठ्या घसरणीनंतर बुधवारी शेअर बाजाराची सुरुवात थोडी मिश्र झाली. सुरुवातीच्या काही मिनिटांत बाजारात मोठे चढ-उतार दिसले. सेन्सेक्स आणि निफ्टी कधी लाल तर कधी हिरव्या रंगात फिरताना दिसले. मात्र काही वेळातच विक्रीचा जोर वाढला आणि बाजार पुन्हा घसरला. सुरुवातीला मिडकॅप आणि स्मॉलकॅप निर्देशांकही घसरणीसह व्यवहार करत होते. आजच्या ट्रेडिंगमध्ये काही क्षेत्रात खरेदी दिसली, तर काही क्षेत्रांत घसरण झाली आहे.
आज मेटल, फार्मा, FMCG आणि ऑटो या सेक्टरमध्ये काहीशी वाढ झाली. दुसरीकडे आयटी, रिअॅल्टी आणि NBFC या क्षेत्रातही हालचाल झाली, मात्र एकूण बाजाराचा मूड अजूनही सावध आहे.
कालच्या क्लोजिंगच्या तुलनेत—
सेन्सेक्स 386 अंकांनी घसरून 81,794 वर उघडला
निफ्टी 91 अंकांनी घसरून 25,141 वर उघडला
बँक निफ्टी 262 अंकांनी घसरून 59,142 वर उघडला
चलन बाजारातही घसरण वाढली. रुपया 13 पैशांनी घसरून 91.13 प्रति डॉलरच्या आसपास पोहोचला. हा रुपयाचा नवा नीचांकी स्तर मानला जात आहे.
GIFT निफ्टी सुमारे 35 अंकांनी वाढून, 25,300 च्या जवळ ट्रेड होत होता. तसेच डाओ फ्युचर्सही सुमारे 100 अंकांनी वाढले होते. त्यामुळे सुरुवातीला भारतीय बाजार फ्लॅट ते पॉझिटिव्ह राहू शकतो, असा अंदाज होता. मात्र जागतिक पातळीवर तणावाचे वातावरण आहे. ग्रीनलँडबाबत ट्रम्प यांच्या धमकीसदृश वक्तव्यांमुळे जागतिक बाजारात अस्थिरता वाढली.
अमेरिकेत जोरदार विक्री झाली. एका दिवसात डाओमध्ये मोठी घसरण झाली आहे.
डाओ सुमारे 870 अंकांनी घसरला
नॅस्डॅक जवळपास 550 अंकांनी कोसळला
ही 10 ऑक्टोबरनंतरची सर्वात मोठी इंट्राडे घसरण मानली जात आहे.
युरोपियन युनियनच्या प्रमुख उर्सुला वॉन डेर लेयेन यांनी भारतासोबत आतापर्यंतची सर्वात मोठी ट्रेड डील लवकर होईल, असे संकेत दिले आहेत. त्या 25 ते 27 जानेवारीदरम्यान भारत दौऱ्यावर येणार आहेत.
दरम्यान वर्ल्ड इकॉनॉमिक फोरम (दावोस)च्या मंचावर केंद्रीय मंत्री अश्विनी वैष्णव यांनीही सांगितले की, स्थिर धोरणांमुळे जग भारताकडे ट्रेड पार्टनर म्हणून पाहत आहे.
