Gold-Silver Rate Today
दिल्ली: मध्यपूर्वेतील युद्धजन्य परिस्थिती आणि इस्रायल-इराण यांच्यातील वाढता तणाव असूनही, भारतीय सराफ बाजारात या आठवड्यात सोन्या-चांदीच्या दरात मोठी घसरण पाहायला मिळाली आहे. गेल्या सात दिवसांत २४ कॅरेट सोन्याच्या किमतीत प्रति १० ग्रॅम तब्बल ५,०६० रुपयांची कपात झाली आहे, तर चांदीच्या दरात १०,००० रुपयांची घसरण नोंदवण्यात आली आहे.
आज ८ मार्च रोजी देशातील प्रमुख शहरांमध्ये सोन्याचे दर खालीलप्रमाणे आहेत:
नवी दिल्ली: २४ कॅरेट सोन्याचा भाव १,६३,८०० रुपये प्रति १० ग्रॅम आहे.
मुंबई/पुणे/बेंगळुरू: या शहरांमध्ये २४ कॅरेट सोने १,६३,६४० रुपये तर २२ कॅरेट सोने १,४७,६९० रुपये प्रति १० ग्रॅमवर स्थिरावले आहे.
चेन्नई आणि कोलकाता: येथेही २२ कॅरेटसाठी १,४७,६९० रुपये आणि २४ कॅरेटसाठी १,६३,६४० रुपये असा दर सुरू आहे.
शुक्रवारी (६ मार्च) दिल्लीच्या सराफा बाजारात सोन्याच्या किमतीत १,१०० रुपयांची घट होऊन भाव १,६४,१०० रुपयांवर आला होता. व्यापाऱ्यांनी सलग दुसऱ्या दिवशी केलेल्या नफाखोरीमुळे ही घसरण झाल्याचे तज्ज्ञांचे म्हणणे आहे. मात्र, आंतरराष्ट्रीय बाजारात भू-राजकीय तणावामुळे सुरक्षित गुंतवणूक म्हणून सोन्याची मागणी वाढली असून, तिथे सोन्याचा भाव ५,०९५.८१ डॉलर प्रति औंसवर पोहोचला आहे.
सोन्यापाठोपाठ चांदीच्या किमतीतही मोठी घसरण झाली आहे. एका आठवड्यात चांदी १०,००० रुपयांनी स्वस्त झाली आहे. आज ८ मार्च रोजी सकाळी चांदीचा भाव २,८५,००० रुपये प्रति किलो इतका आहे. विशेष म्हणजे, जानेवारी महिन्यात चांदीने ४ लाख रुपयांचा ऐतिहासिक टप्पा ओलांडला होता, त्या तुलनेत आता मोठी सवलत मिळत आहे. आंतरराष्ट्रीय बाजारात चांदीचा भाव १.४ टक्क्यांनी वधारून ८३.४० डॉलर प्रति औंस झाला आहे.
२८ फेब्रुवारी २०२६ रोजी इस्रायल आणि अमेरिकेने इराणविरुद्ध युद्धाची घोषणा करत हवाई हल्ले केले होते. त्याला प्रत्युत्तर म्हणून इराणनेही इस्रायलवर क्षेपणास्त्र आणि ड्रोनद्वारे हल्ले चढवले आहेत. अमेरिकेचे राष्ट्राध्यक्ष डोनाल्ड ट्रम्प यांनी स्पष्ट केले आहे की, "इराणने विनाअट शरणागती पत्करल्याशिवाय कोणताही करार शक्य नाही." या जागतिक अस्थिरतेचा परिणाम आगामी काळात बाजारपेठेवर होण्याची शक्यता आहे.
