EPFO WhatsApp Service: कर्मचारी भविष्य निर्वाह निधी संघटनेने (EPFO) आपल्या सदस्यांसाठी एक नवीन WhatsApp सेवा सुरू केली आहे. या सुविधेमुळे आता पीएफ खात्यात किती पैसे जमा आहेत, शेवटचे व्यवहार किती झाले आणि खात्याच्या पासबुकमधील माहिती काय आहे, हे सहज समजणार आहे. विशेष म्हणजे, यासाठी EPFO च्या कार्यालयात जाण्याची किंवा वेगवेगळ्या वेबसाइटवर लॉगिन करण्याची गरज नाही. फक्त WhatsApp वर एका नंबरवर ‘Hi’ असा मेसेज पाठवायचा आहे. त्यानंतर पीएफ खात्याशी संबंधित माहिती मिळवता येईल.
EPFO ने आपल्या सदस्यांसाठी WhatsApp आधारित सेवा सुरू केली आहे. केंद्रीय कामगार आणि रोजगार मंत्री मनसुख मांडविया यांनी या सुविधेची सुरुवात केली. या सेवेमुळे नोकरदार कर्मचाऱ्यांना त्यांच्या पीएफ खात्याची माहिती मोबाइलवरच मिळवता येणार आहे.
EPFO च्या अधिकृत सोशल मीडिया पोस्टनुसार, या WhatsApp सेवेद्वारे सदस्यांना त्यांच्या पीएफ खात्यातील शिल्लक रक्कम तपासता येईल. तसेच खात्यात झालेले शेवटचे पाच व्यवहार पाहता येतील. एवढेच नाही, तर पीएफ खात्याची पासबुकही डाउनलोड करता येणार आहे.
यामुळे कर्मचाऱ्यांना पीएफ खात्याची माहिती मिळवण्यासाठी वारंवार EPFO च्या वेबसाइटवर जाण्याची गरज नाही. WhatsApp च्या माध्यमातून ही प्रक्रिया अधिक सोपी होणार आहे.
EPFO ने या सुविधेसाठी 8796441800 हा WhatsApp क्रमांक उपलब्ध करून दिला आहे. या क्रमांकावर मेसेज पाठवून सदस्यांना पीएफ खात्याशी संबंधित सेवा वापरता येतील.
EPFO ने या सुविधेसाठी QR कोडदेखील उपलब्ध करून दिला आहे. हा कोड स्कॅन केल्यानंतर थेट WhatsApp चॅट सुरू करता येईल. त्यानंतर दिलेल्या सूचनांनुसार आवश्यक माहिती मिळवता येईल.
EPFO ची WhatsApp सेवा वापरण्याची प्रक्रिया अगदी सोपी आहे. त्यासाठी खालील टप्पे पूर्ण करा.
सर्वप्रथम 8796441800 हा EPFO चा WhatsApp क्रमांक आपल्या मोबाइलमध्ये सेव्ह करा.
त्यानंतर WhatsApp उघडून या क्रमांकावर चॅट सुरू करा.
आता या नंबरवर ‘Hi’ असा मेसेज पाठवा.
त्यानंतर स्क्रीनवर दिलेल्या सूचनांनुसार प्रक्रिया पूर्ण करा.
WhatsApp वापरत असलेला मोबाइल क्रमांक तुमच्या UAN शी जोडलेला असणे आवश्यक आहे.
पडताळणी पूर्ण झाल्यानंतर तुम्हाला उपलब्ध सेवांचे पर्याय दिसतील.
त्यातून PF Balance, Transaction Details किंवा Passbook Download यापैकी आवश्यक पर्याय निवडा.
यानंतर तुम्हाला तुमच्या पीएफ खात्याशी संबंधित उपलब्ध माहिती WhatsApp वर मिळू शकेल.
अनेक कर्मचाऱ्यांना त्यांच्या पीएफ खात्यात किती पैसे जमा झाले आहेत, कंपनीकडून नियमित पैसे भरले जात आहेत की नाही आणि शेवटचा व्यवहार कधी झाला, याची माहिती मिळण्यात अडचणी येतात. अशा वेळी EPFO ची WhatsApp सेवा उपयोगी ठरू शकते.
मोबाइलवरूनच पीएफ खात्याची माहिती मिळत असल्यामुळे वेळेची बचत होईल. तसेच पीएफ खात्यातील व्यवहारांवर लक्ष ठेवणेही सोपे होणार आहे.
नोंद: WhatsApp वर पीएफ खात्याची माहिती मिळवताना अधिकृत EPFO क्रमांकाचाच वापर करा. कोणालाही तुमचा UAN पासवर्ड, OTP किंवा इतर गोपनीय माहिती शेअर करू नका. WhatsApp वर दिसणाऱ्या लिंक आणि सूचनांची खात्री करूनच त्यांचा वापर करा.