What is Morning stiffness Explained In Marathi
सकाळी गजर वाजतो, डोळे उघडतात, पण शरीर जणू काही ऐकायलाच तयार नाही. मान आखडलेली, पाठ ताठरलेली आणि संपूर्ण अंग जड झाल्याचा अनुभव तुम्हालाही येतोय का? पूर्वी हा त्रास फक्त ज्येष्ठांपुरता मर्यादित मानला जायचा, पण आता ३०-४० शी मधील तरुणाईलाही 'मॉर्निंग स्टिफनेस'ने (Morning Stiffness) विळखा घातला आहे.
झोपेतून उठल्यावर काही मिनिटांपासून ते अर्ध्या तासापर्यंत शरीर ताठर वाटण्याच्या या समस्येकडे दुर्लक्ष करणं धोकादायक ठरू शकतं. वर्क फ्रॉम होम, बैठी जीवनशैली आणि वाढत्या ताणतणावामुळे ही समस्या आता घराघरात पोहोचली आहे. चला, जाणून घेऊया यामागची कारणं आणि त्यावरचे सोपे उपाय.
'मॉर्निंग स्टिफनेस'साठी आपली बदललेली जीवनशैली आणि काही सवयी प्रामुख्याने जबाबदार आहेत.
रात्रभर हालचालींचा अभाव: झोपेच्या ६ ते ८ तासांमध्ये शरीर जवळपास निश्चल अवस्थेत असते, ज्यामुळे स्नायू आणि सांधे आखडतात.
बैठी जीवनशैली: दिवसभर कॉम्प्युटरसमोर एकाच जागी बसून काम केल्याने पाठीच्या आणि मानेच्या स्नायूंवर प्रचंड ताण येतो, जो सकाळी ताठरपणाच्या रूपात जाणवतो.
पोषक तत्वांची कमतरता: शरीरात व्हिटॅमिन डी, व्हिटॅमिन बी१२ आणि कॅल्शियमची कमतरता असल्यास हाडे आणि स्नायू कमकुवत होतात, ज्यामुळे सकाळी अंग जड वाटते.
तणाव आणि अपुरी झोप: मानसिक ताण आणि शांत झोप न लागल्याने शरीराला पुरेशी विश्रांती मिळत नाही. याचा थेट परिणाम स्नायूंच्या आरोग्यावर होतो.
चुकीची गादी आणि उशी: शरीराला योग्य आधार न देणारी गादी किंवा मानेला चुकीच्या स्थितीत ठेवणारी उशी हेदेखील यामागील एक महत्त्वाचे कारण आहे.
मॉर्निंग स्टिफनेसवर मात करण्यासाठी महागड्या औषधांची नाही, तर काही सोप्या सवयी बदलण्याची गरज आहे.
उठल्या उठल्या जागेवरच व्यायाम: सकाळी उठल्यावर अंथरुणातच हात-पाय हलकेसे ताणा. यामुळे शरीरातील रक्तप्रवाह सुधारण्यास त्वरित मदत होते.
गरम पाणी आणि थोडे चालणे: एक ग्लास कोमट पाणी प्या आणि घरातल्या घरात ५-१० मिनिटे चाला. यामुळे शरीरातील ताठरपणा वेगाने कमी होतो.
साधे स्ट्रेचिंग: मानेचे, खांद्याचे आणि पाठीचे सोपे स्ट्रेचिंग व्यायाम करा. यासाठी वेगळा वेळ काढण्याची गरज नाही, हे तुम्ही तुमच्या कामाच्या ठिकाणी बसल्याजागीही करू शकता.
बहुतेक वेळा 'मॉर्निंग स्टिफनेस' जीवनशैलीतील बदलांनी नियंत्रणात येतो. मात्र, काही लक्षणं गंभीर आजाराचे संकेत असू शकतात.
सांध्यांवर सूज येत असेल, हलका ताप जाणवत असेल किंवा चालताना त्रास होत असेल, तर याकडे अजिबात दुर्लक्ष करू नका. अशी लक्षणे दिसल्यास वेळ न घालवता तातडीने फिजिशियन किंवा संधिवाततज्ज्ञांचा (Rheumatologist) सल्ला घेणे अत्यंत महत्त्वाचे आहे.
'मॉर्निंग स्टिफनेस' ही एक धोक्याची घंटा आहे, जी आपल्याला सांगते की शरीर आणि जीवनशैलीकडे लक्ष देण्याची वेळ आली आहे. शेवटी, एक गोष्ट लक्षात ठेवली पाहिजे – "हालचाल हाच उपचार आहे आणि त्यासाठी वेळ काढलाच पाहिजे."
